BAUKAU, 06 Marsu 2026 (TATOLI)—Komisaun Nasionál Eleisaun (CNE-sigla portugeza) Munisípiu Baukau sei realiza edukasaun sivíka liuhusi debate polítika entre partidu hodi hasoru podér lokál desentralizasaun administrativa.
Diretór CNE Munisípiu Baukau, Esmeraldo Damião Belo, esplika atividade referida iha ona faze planeamentu no tuir planu sei realiza iha trimestrál dahuluk ramata iha-ne’ebé sei halo aprosimasaun ho Autoridade Munisipál Baukau inklui aprovasaun no orsamentu husi nasionál.
“Partidu polítiku sira debate kona-ba plataforma jerál nune’e eleitór sira tetu hodi deside votu bainhira realiza eleisaun munisipál,” Esmeraldo Belo informa ba TATOLI iha ninia kna’ar fatin, Vila Nova, Baukau, Sesta ne’e.
Esmeraldo Belo relata debate polítika referida sei partisipa husi eleitór iha-ne’ebé kada partidu sei aprezenta plataforma polítika liuliu konseitu kona-ba podér lokál no desentralizasaun administrativa bainhira partisipa iha eleisaun munisipál hanesan asembleia munisipál no prezidente autoridade munisipál.
Nia subliña CNE sei informa ba partidu polítika ne’ebé ezizte iha Baukau atu partisipa debate referida ho objetivu introdús programa no vizaun estratéjika kona-ba podér lokál ne’ebé antes ne’e realiza no hetan entusiazmu husi eleitór.
“Tópiku importante mak partidu polítiku nia preparasaun ba podér lokál no desentralizasaun administrativa,” Esmeraldo Belo akresenta.
Prosesu implementasaun podér lokál no desentralizasaun administrativa bazeia ba Konstitusaun Repúblika Demokratika Timor-Leste (KRDTL) artigu 72, nune’e loke dalan ba kriasaun Lei Númeru 23/2023, loron 10 Novembru, iha-ne’ebé loke dalan realiza eleisaun munisipál bazeia ba Lei Númeru 22/2021, loron 4 Novembru, ne’ebé sei regulariza mekanizmu eleisaun ba membru asembleia no prezidente autoridade munisipál.
Entretantu, partidu polítiku ne’ebé sei partisipa iha debate ne’e mak Kongresu Nasionál Rekonstrusaun de Timor (CNRT-sigla portugeza), Frente Revolusionária Timor-Leste Independénsia (FRETILIN), Kmanek Haburas Unidade Nasionál Timor Oan (KHUNTO), Partidu Demokrátiku (PD) no Partidu Unidade Dezenvolvimentu Demokrátiku (PUDD).
Jornalista: Natalino Belo
Editór: Xisto Freitas da Piedade
