Misaun diplomátika termina iha Marsu, Okto Dorinus despede PPN
DILI, 06 Marsu 2026 (TATOLI) – Embaixadór Indonézia iha Timor-Leste, Okto Dorinus Manik, termina misaun diplomátika iha Marsu 2026, nune’e ohin despede Prezidente Parlamentu Nasionál (PPN), Maria Fernanda Lay, antes fila bá Indonézia iha loron 01 Abríl.
Iha sorumutu ne’e, diplomata indonéziu hato’o agradesimentu ba kolaborasaun serbisu durante ne’e, liuliu mantein kooperasaun ba dezenvolvimentu Timor-Leste iha futuru.
Nia partilla sentimentu kontente durante hela iha Timor-Leste ho amizade hala’o misaun durante tinan haat liu fulan tolu.
Prezidente Parlamentu Nasionál, Maria Fernanda Lay, hato’o mós agradesimentu no apresiasaun ba serbisu embaixadór nian durante mandatu hodi kontribui ba serbisu sira iha país ne’e.
Lembra katak durante asume knaar iha Timor-Leste, Okto Dorinus, hametin relasaun entre nasaun rua no hasa’e kooperasaun estratéjika iha área edukasaun, seguransa no komérsiu.
Antes ne’e, Embaixadór Okto Manik despede ofisialmente Prezidente Repúblika, José Ramos-Horta, iha serimónia resepsaun diplomátika ne’ebé komemora aniversáriu Independénsia Indonézia ba da-80, ne’ebé hala’o iha Salaun Multiusos GMN, Bebora, Dili.
Iha eventu ne’e, Okto Dorinus Manik hateten katak nia mandatu iha Timor-Leste nu’udar períodu ida-ne’ebé signifikativu liu iha nia karreira diplomátika, tanba hetan onra atu serbí komunidade timoroan, liuliu iha Dili.
“Hanesan onra ida hodi serbí iha lideransa husi estadista na’in rua, Prezidente Ramos-Horta ho Primeiru-Ministru Xanana Gusmão. Ita-boot nia lideransa la’ós de’it orienta nasaun ida ne’e maibé hametin mós lasu sira maun-alin nian entre Indonézia no Timor-Leste”, nia realsa foin lalais ne’e.
Notísia relevante: Tempu besik, Embaixadór Okto Dorinus termina misaun diplomata iha TL
Jornalista: Nelson de Sousa
Editora: Maria Auxiliadora
