UNICEF konsidera mánutrisaun kazu sériu ne’ebé presiza kombate
DILI, 06 Marsu 2026 (TATOLI)—Organizasaun internasionál United Nations Children’s Fund (UNICEF) konsidera kazu mánutrisaun ne’e sériu tebes ne’ebé presiza atu kombate.
Nia hatutan, kazu mánutrisaun nu’udar preokupasaun ne’ebé boot tebes maibé daudaun ne’e nia labele relata dadus konkreta tamba dadus ne’ebé hetan depende mak sensu uma kain no dadus ne’e kuaze iha tinan 10-resin tiha ona.
“Kauza husi moras má-utrisaun tanba labarik sira menus konsumu aihan nutritive. Dalaruma barak liu mak konsumu hahan instant (makanan siap saji), laiha proteina, vítamina no karbohidratu, nune’e UNICEF hamutuk ho pesoál saúde sira konsege halo servisu saúde movel ba área remota hodi halo intervensaun kona-ba nutrisaun ba família sira-ne’ebé iha labarik ki’ik no inan isin-rua,” Reprezentante UNICEF iha Timor-Leste, Patrizia Diziovanni, ne’e informa ba jornalista sira iha Palásiu Governu, ohin.
Aleinde ida ne’e, inan sira mós tenke envolve iha atividade edukasaun nutrisionál, ho demonstrasaun prátika kona-ba oinsa prepara refeisaun ekilibradu no riku, kona-ba prátika di’ak ba ijene no kona-ba kuidadu saúde ne’ebé relasaiona ho moras sira ne’ebé mosu beibeik iha labarik oan sira, interligadu tebes ho Atensaun Integradu ba Moras Neonatal no Infánsia (AIDNI).
“Entaun, ita presiza atu halo fali sensu populasaun, nune’e bele hetan fali dadus atuál kona-ba mánutrisaun, konserteza UNICEF prontu nafatin halo intervensaun hodi minimiza númeru mánutrisaun iha Timor-Leste,” nia afirma.
Entretantu, bazeia ba dadus ne’ebé fó sai husi Organizasaun Mundiál Saúde (OMS) ne’e dadus mánutrisaun (stunting) atinje 47% maibé Governu planeia sei redús 25% iha tinan 2030.
Jornalista : Alexandra da Costa
Editór : Cancio Ximenes
