Governu rezolve ona problema menus profesór iha EBF Nazaré
BOBONARU, 07 Marsu 2026 (TATOLI)—Diretór Edukasaun Munisípiu Bobonaru, Miguel Freitas, informa Governu liuhusi Ministériu Edukasaun koloka ona profesór foun bolsa kandidatura (BK) na’in-tolu ba Eskola Ensinu Bazíku Filiál (EBF) Nazaré, Suku Lourba, Postu Administrativu Bobonaru, hodi hala’o prosesu aprendizajen.
Miguel Freitas hato’o asuntu ne’e hodi responde informasaun ne’ebé virál iha mídia sosiál katak EBF Nazaré laiha profesór no ensinu aprendizajen ba estudante primeiru to’o segundu anu paradu durante fulan rua.
“Informasaun prosesu aprendizajen paradu ne’e laloos,” nia informa ba jornalista sira iha Maliana, Sábadu ne’e.
Iha parte seluk, Koordenadór EBF Nazaré, Afonso Barreto, haktuir iha loron Kinta liubá (05/03) sira simu ona kolokasaun profesor BK na’in-tolu no sei hahú servisu iha Segunda semana oin (09/03).
“Durante ne’e la abandona labarik sira. Ha’u mak kontrola primeiru to’o terseiru anu. Agora sira mai ona ita agradese. Bá-oin ne’e prosesu aprendizajen bele la’o ho di’ak fali,” nia hakotu.
Totál estudante tinan letivu 2026 iha EBF Nazaré hamutuk 284 no profesór na’in (9).
Jornalista: Sergio da Cruz
Editor: Xisto da Freitas Piedade
