MANUFAHI, 08 Marsu 2026 (TATOLI)–Primeiru-Ministru, Xanana Gusmão, lansa projetu reabilitasaun estrada husi diresaun Betanu bá Natarbora no melloramentu projetu fornesimentu bee-moos ba komunidade iha Same Vila, Munisípiu Manufahi.
Iha biban ne’e, Ministu Obra Públika, Samuel Marçal asina ona kontratu ho kompañia implementadora ba projetu reabilitasaun estrada husi diresaun Betanu (Manufahi) bá Natarbora (Manatuto) kuaze kilómetru 12 no melloramentu sistema fornesimentu bee-moos ba komunidade hamutuk 3.250 iha Same.
Primeiru-Ministru, Kay Rala Xanana Gusmão, hateten ukun-an la’ós atu manán de’it bandeira, maibé atu serbí rai ida ne’e, tanba kontribuisaun hotu-hotu nian mak bele konkista ukun rasik-an.
Tanba ne’e, nia esplika, iha Planu Estratéjiku Dezenvolvimentu Nasionál (PEDN) 2011-2030 tau importánsia ba infraestrutura bázika nu’udár baze dezenvolvimentu ba povu nia moris di’ak.
“Ha’u kontente tebes haree imi hotu nia prezensa iha-ne’e tanba imi mai iha-ne’e atu fó lembra ba membru Governu sira hotu katak servisu ne’ebé iha lahaluha ho imi-nia sakrifísiu. Husi imi-nia terus mak ita manán independénsia,” Primeiru-Ministru informa liuhusi nia diskursu iha lansamentu projetu referidu, Manufahi, Domingu ne’e.
Tuir Xanana povu tenke sente duni dezenvolvimentu infraestrutura bázika hanesan estrada, ahi no bee-moos.
Iha fatin hanesan, Ministru Obra Públika, Samuel Marçal, hateten hafoin simu pose ba kna’ar hanesan ministru, Primeiru-Ministru bolu kedas nia atu tau importánsia ba programa prioridade tolu hanesan estrada, bee-moos no eletrisidade.
“Tamba ne’e, ohin ita mai asina kontratu ho kompañia implementadora sira iha povu nia oin atu halo reabilitasaun estrada diresaun Betanu bá Fatuberliu no mós loke serimónia atu dada bee ba Same ne’ebé sai hanesan kapitál munisípiu.
Nia hato’o agradese ba komunidade afetada sira-ne’ebé koopera ho Governu hodi fó sira-nia rai no toos sira ba implementasaun projetu ida-ne’e.
Samuel esplika sistema fornesimentu bee-moos ne’e moderniza ba filtrasaun, komunidade bele konsume direta, la presiza nono.
Iha parte seluk, Prezidente Autoridade Munisípiu Manufahi, Luís Marçal da Costa Tavares hato’o agradese ba Governu ne’ebé bele fó tan oportunidade hodi kria dezenvolvimentu iha Munisípiu Manufahi.
“Liuliu prezensa husi PM iha fatin ida-ne’e maski ho kondisaun katuas ona maibé nafatin iha forsa hodi mai hasoru no fó inspirasaun ba komunidade iha-ne’e,” nia dehan.
Aleinde ne’e, reprezentante komunidade, Ernesto Magno da Silva, sente kontente ho Governu ne’ebé bele realiza ona sira-nia mehi ba dezenvolvimentu nian hanesan estrada, bee-moos no ahi, tanba kuaze durante tempu naruk nia laran sira la asesu estrada no bee-moos ho di’ak.
Projetu reabilitasaun esrada husi diresaun Betanu bá Natarbora kuazé kilometru 12, nia luan metru 6 inklui ho drenajen. Projetu ne’e sei implementa husi kompañia tolu hanesan Lizi Construction Unip, Lda ho durasaun tempu tinan ida no montante orsamentu konstrusaun hamutuk $3.669.237,29, kompañia Tinolina Unip. Lda, ho durasaun ttinan ida ho montante orsamentu $4.705.409,39 no kompañia ida seluk Linatet Unip, Lda, durasaun konstrusaun tinan ida ho totál orsamentu $3.757.483,31. Enkuantu, projetu melloramentu bee-moos iha Same sei implementa husi kompañia internasionál China Nuclear Industry Construction ho durasaun tempu tinan tolu no totál fundu $15.770.204,90.
Jornalista: Alexandra da Costa
Editór: Xisto Freitas da Piedade
