DILI, 09 Marsu 2026 (TATOLI)-Agência Dezenvolvimentu Nasionál (ADN), Janeiru to’o semana dahuluk Marsu nian, halo ona verifikasaun ba dokumentu ba projetu 240 ne’ebé kompostu husi kategória projetu Fundu Infraestrutura, liña ministeriál, emerjénsia, fundu espesiál dezenvolvimentu RAEOA no Ataúru, subvensaun públika no variasaun orden.
Diretór Ezekutivu ADN, Januário Guterres, hateten husi kategória projetu hirak ne’e hanesan iha projetu fundu infraestrutura ne’e iha projetu hamutuk 55, liña ministeriál hamutuk projetu 62, projetu emerjénsia hamutuk 97, fundu espesiál dezenvolvimentu RAEOA no Ataúru hamutuk 16, no variasaun orden hamutuk 10.
“Kategoria projetu hirak ne’e ho montante proposta husi donu projetu hamutuk $34.575.252,74 maibé hafoin ADN halo verifikasaun kustu ne’e hetan fali totál $33.743.832,91, entaun ninia totál poupansa hamutuk $831.419,83,” Nia dehan ba Agência Tatoli iha nia kna’ar fatin, ohin.
Aleinde ne’e, nia informa, sira-nia papél halo inspesaun maibé halo mós estudu no peskiza tanba ADN mós iha unidade ida-idak para halo peskiza kona-ba kualidade materiál sira-ne’ebé empreza uza ba projetu konstrusaun nomós halo kontrola ba kustu implementasaun ho razoavel.
Nia informa, iha tinan 2025. projetu verifikadu hamutuk 878 ho ninia montante proposta husi donu projetu hamutuk $1.596.301.318,80 ho ninia rezultadu verifkasaun tuun fali ba $1.405.093.443,04 no ninia kustu poupansa hamutuk $191.207.875,76.
Nune’e mós, iha tinan 2024. totál projetu verifikadu 515 ho ninia montante proposta husi donu projetu hamutuk $669.235.206,36 ho rezultadu verifikasaun tuun fali ba $576.895.839,69 no ninia kustu popunsa hamutuk $92.339.366,67.
Entretantu, iha fali tinan 2023, totál projetu verifikadu 519 ho ninia montante proposta husi donu projetu hamutuk $437.608.165,05, rezultadu verifikasaun tuun fali ba $387.648.077,80 no ninia kustu popunsa hamutuk $49.960.087,25.
Jornalista : Alexandra da Costa
Editór : Cancio Ximenes
