KOVALIMA, 09 Marsu 2026 (TATOLI)- Prezidente Autoridade Munisípiu Kovalima, Miguel Armada Cardoso, informa daudaun halo hela preparasaun atu simu vizita traballu husi Primeiru-Ministru, Kay Rala Xanana Gusmão, hodi haree besik kondisaun minima ba implementasaun polítika desentralizasuan administrativa no podé lokál.
“Prezensa Primeiru-Ministru, Kay Rala Xanana Gusmão mai iha Munisípiu Kovalima, hanesan vizita Traballu atu haree direta autoridade munisípiu nia-preparasaun bainhira atu simu Podér Lokál vizita ida-ne’e ita konsidera hanesan parte ida avaliasaun kondisaun mínimu”,Prezidente Autoridade kovalima Miguel Armada Cardoso informa ba jornalista iha AMC.
Daudaun ne’e, nia dehan Autoridade Kovalima prepara nia dadus no kondisaun hotu iha setór lojístika no iha setór ekonómia, agrikultura, sosiál, infraestrutura no seluk tan hodi aprezenta ba Xefe Governu.
“Ita organiza malu no hatudu dezempeñu di’ak, maibé ita hein avaliasaun mai husi Primeiru Ministru rasik ita la bele ko’alia se mak pasa no la pasa importante ita prepara aan lai,”nia dehan.
Tuir ajenda, Autoridade Kovalima simu vizita Xefe Governu ho nia komitiva iha loron 10 Marsu husi Ainaro mai Iha munisípiu Kovalima no iha loron 11 Marsu mak ajenda hala’o sorumutu ne’ebé partisipa husi autoridade,servisu delegasaun territoriál, servisu delegasaun Munisipál, administradór postu administrativu, komunidade, Konsellu Suku, Joven-sira no inteletuál no lia na’in-sira.
PAM Kovalima mós orienta ba xefe suku sira mobiliza komunidade hein no hakerek iha spanduk ho lia-fuan “Ami suku Labarai prontu atu simu Podér Lokál”.
Iha fatin hanesan, Xefe Suku Labarai, Paul de Sena, reforsa simu ona orientasaun husi Prezidente Autoridade Kovalima hodi mobiliza komunidade hein prezensa Xefe Governu hala’o vizita traballu iha Kovalima.
“Sim, ami iha ona orientasaun husi PAM hodi mobiliza Komunidade, veteranu no inteletuál sira hodi hein Primeiru-Ministru, Kay Rala Xanana Gusmão,” nia reforsa.
Jornalista:Celestina Teles
Editór: Florencio Miranda Ximenes
