BAUKAU, 09 Marsu 2026 (TATOLI)—Autoridade suku tinan-ne’e deside sei reabilita estrada diresaun Haurobu ba estrada protokolu Suku Bahú liuhusi Programa Nasionál Dezenvolvimentu Suku (PNDS).
Xefi Suku Kaibada Uaimu’a, Postu Administrativu Baukau Vila, Cosme da Costa Lopes, esplika desizaun referida bazeia ba pedidu husi komunidade tanba sei hakbesik movimentasaun transporte ba merkadu Tuanua no Ospitál Rejionál Eduardo Ximenes (HoREX-sigla portugeza) bainhira kompara ho estrada diresaun Haurobo liga bá Vila Antiga.
“Ami sei enkontru ikus nian entre komunidade ho tékniku PNDS hodi rona hanoin ligadu ho atividade regulár ne’e,” Xefe Suku Kaibada informa ba TATOLI liuhusi telefónema, Segunda ne’e.
Cosme Lopes relata proposta atividade regulár PNDS tinan-ne’e submete ona ba PNDS munisipál no hetan ona resposta iha-ne’ebé sei kompleta rekizitu bazeia ba matadalan ne’ebé sei benefísia komunidade hamutuk 213 iha Aldeia Haurobo.
Aleinde ne’e, estrada referida tuir planu sei hala’o ho mekanizmu serbisu ateru no cor iha fatin rua ne’ebé konsideradu subida ho distánsia purvolta metru 3.978 ho alokasaun orsamentu hamutuk $ 39.93
“Sei hahú tempu besik hafoin ramata orden husi postu administrativu no autoridade munisipál hodi halo levantamentu dadus no loke konkursu,” Cosme Lopes akresenta.
Mezmu nune’e, Suku Kaibada sei kontinua enfrenta kondisaun estrada tanba foin responde pursentu 50, enkuantu iha parte seluk presiza hetan atensaun liuliu estrada ligasaun Aldeia Kaisidu, suku Tirilolo ba Vila Antiga, Bahú ho kilómetru 10-resin no Aldeia Wani-uma ba fatin turizmu iha tasi ho distánsia kilómetru lima.
Entretantu, Suku Kaibada hamutuk aldeia tolu kompostu husi Ana-uaru, Uani-uma, Haurobu ho totál populasaun hamutuk rihun tolu-resin no uma-kain 600-resin.
Jornalista: Natalino Belo
Editór: Xisto Freitas da Piedade
