VIKEKE, 09 Marsu 2026 (TATOLI)—Diretór Edukasaun Munisípiu Vikeke, António Pinto da Silva, klarifika kona-ba Programa Merenda Eskolár (PME) iha Munisípiu Vikeke ne’ebé seidauk implementa.
“Ohin loron ita tama ona iha fulan-Marsu, maibé seidauk implementa PME, tanba mudansa kargu diretór ne’ebé akontese iha fulan kontuk, entaun afeta mós ba PME kona-ba asinatura nian. Tanba ne’e, foin lalais ami bá banku, ema dehan tenke hasai despaxu husi Ministériu Edukasaun (ME), nune’e telefone ona ba Diretór Jerál Administrasaun Finansa husi Ministériu Edukasuan atu halo karta akompañamentu ba ministériu finansa,” nia haktuir.
“Nune’e, ha’u orienta ona ami-nia xefe departamentu dezloka bá ona nasionál hodi trata karta akompañnamentu, depois xefe departamentu mai fali ami bele lori ona karta referidu bá banku atu ami bele asina orsamentu programa merenda eskolár nian,” António Pinto ba TATOLI iha Postu Vikeke Vila, ohin.
Diretór SME munisípiu Vikeke ne’e profundu, mudansa estrutura kargu diretór ida-ne’e mak difikulta ba prosesu implementasaun programa Merenda Eskolár tanba iha fulan marsu ona, estudante sira seidauk komsumu programa ME.
“Ha’u rekoñese ida-ne’e viola diretu estudante sira-nia ba komsumu programa merenda eskolár, tanba ninia efeitu mai husi mudansa estrutura iha SME Vikeke. Nune’e ami mós esforsu hela ba karta akompañamentu ne’ebé husi nasionál bainhira karta mai ona, ami bele aselera prosesu sira-ne’e” Segunda ne’e.
Nia promete, PME ne’e sei implementa iha semana oin tanba orsamentu ba programa ne’e transfere ona ba banku.
Entrentatu, menu ba implementasaun PME tinan 2026 mak utiliza produtu lokál 75% no produtu importadu 25%.
Alokasaun orsamentu ba PME tinan 2026 ho totál $1.069.016,34, kada estudante sei benefísia sentavu 0,42. Programa ne’e sei kobre eskola ensinu báziku hamutuk 18 ho totál estudante hamutuk 20.487, kompostu husi ensinu báziku ho ensinu báziku Filiál hamutuk 18.535, ensinu pré-eskolár hamutuk 1.952, inklui eskola privada no públiku sira iha munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
