DILI, 09 Marsu 2026 (TATOLI)—Sekretária Estadu Formasaun Profiaionál no Empregu (SEFOPE) ofisialmente lansa portál online ba traballadór no kandidatu travalladór sira-ne’ebé servisu no atu servisu iha Austrália liuhusi programa Pacific Australia Labour Mobility (PALM).
Sekretáriu Estadu Formasaun Profisionál no Empregu, Rogério Araújo Mendonça, hateten ohin hamutuk ho Embaixada Austrália liuhusi DFAT lansa portál online ba traballadór sira hodi fó kbiit ba joven timoroan sira bele asesu diretu ba sira-nia informasaun.
Portál ida-ne’e importante tebes ba timoroan sira no objetivu lansamentu ne’e iha pontu tolu mak hanesan kooperasaun servisu bilaterál, transparánsia iha prosesu rekrutamentu no bele fasilita joven sira asesu ho lalais hodi ba servisu iha rai-li’ur.
“Entaun, ida-ne’e fasíl liu tanba bainhira kandidatu sira atu hatama dokumentu sira tenke mai Dili no ba fali munisípiu, maibé agora kandidatu sira bele rejista direta husi telemovel, laptop,” Governante ne’e informa ba jornalista sira iha edifísiu DNEE, City-8 Manleuana, ohin.
Aleinde ne’e, nia dehan, traballadór reentry sira mós atu asesu informasaun (update) la presiza ona ba Dirasaun Nasionál Empregu Estranjeiru (DNEE) maibé bele asesu direta liuhusi portál traballadór nian.
Iha fatin hanesan, Diretór Nasionál Empregu Estranjeiru, João Correia Pereira, hatete objetivu ida ohin ne’e hodi lansa portál traballadór no fó kbiit ba maluk timoroan sira envolve-an iha programa Pacific Australia Labour Mobility Skill nian.
“Entaun traballadór timoroan bele asesu direta sira-nia perfil rasik no haree rasik sira-nia faze to’o ona iha ne’ebé hodi hein prosesu tuir mai. Tanba dalaruma kandidatu sira
mai iha fatin ida-ne’e hodi husu informasaun,” nia dehan.
Nune’e, nia hatutan, portál online ba traballadór ida-ne’e sei transmite ba munisipiu hotu-hotu, atu nune’e joven sira iha munisípiu bele asesu portál traballadór ne’e.
Jornalista : Alexandra da Costa
Editór : Cancio Ximenes
