DILI, 10 Marsu 2026(TATOLI)–Tribunál Judisiál Primeira Instánsia Dili (TJPID), Tersa ne’e, halo julgamentu dahuluk ba kazu falsifikasaun dokumentu ne’ebé envolve husi arguidu na’in-tolu iha tinan 2022.
Iha kazu ne’e, arguidu sira suspeitadu halo falsifikasaun dokumentu kona-ba COVID-19 nian.
Iha audiénsia julgamentu ne’e, Tribunál ajenda atu halo produsaun deprova hodi lee sai akuzasaun sira ne’ebé Ministériu Públiku imputa ba arguidu.
Hafoin Juíz Singulár Ana Paula Fonseca ne’ebé prezide loke audiénsia julgamentu ba kazu, nune’e Ofisiál Justisa informa katak argudu sira ne’ebé nu’udar interventente ba prosesu ne’e partisipa hotu maibé Ministériu Públiku mak la partisipa, maski nia hatene katak kazu ne’e ohin hahú halo julgamentu.
Notísia relevante : Tribunal Promove Lian Ofisiál iha Audiénsia Julgamentu
Tuir Ofisiál Justisa, haktuir iha sala julgamentu katak ajente Mínistériu Públiku, Prokuradór Pedro Batista auzente iha julgamentu ne’e tanba nia tuir hela Julgamentu Movél iha Munisípiu Likisá.
Tanba ne’e, iha kazu ida ne’e Tribunál notifika de’it ba Prokuradór Titulár Pedro Batista hafoin julgamentu ba kazu ne’e. Maibé ho situasaun ne’e, Tribunál liuhusi Juíz prosesu Ana Paula Fonseca iha sala julgamentu haruka nia Ofisiál Justisa solisita ba Konsellu Majistratura Ministeriu Públiku atu justifika ajente ne’e nia falta iha julgamentu.
“Halo pedidu hodi nitifika Konsellu Superiór Majistratura Ministériu Públiku kona-ba falta Ministériu Públiku nia ajente iha julgamentu,” Ana Paula Fonseca hato’o iha sala julgamentu iha TJPID, Kaikoli.
Hafoin ida-ne’e, Juiza Ana Paula Fonseca pronúnsia iha sala julgamentu katak adia kazu falsifikasaun dokumentu ne’ebé envolve husi Arguidu na’in-tolu ne’e ba fali loron 01 Dezembru 2026.
Tuir Artigu 260.º husi Kódigu Penál Timor-Leste ne’ebé ko’alia kona-ba Ministériu Públiku ka defensór nia falta :
1 – Ministériu Públiku ka defensór nia falta la serve hanesan baze atu adia audiénsia-julgamentu.
2 – Iha Ministériu Públiku nia fatin tenke hatama Ministériu Públiku nia substitutu legál; iha defensór nia fatin tenke hatama pesoa idónea, ho preferénsia ba advogadu lisensiadu iha direitu. Selae, iha nulidade insanavel.
3 – Tenke fó ba substitutu ne’e tempu nesesáriu atu prepara julgamentu, nomeadamente atu konsulta autus no kontakta arguidu.
Jornalista : Natalino Costa
Editora : Julia Chatarina
