DILI, 10 Marsu 2026 (TATOLI) – Diresaun Nasionál Transporte Terrestre (DNTT) no Polísia Nasionál Nasionál Timor-Leste (PNTL), liuhusi Diresaun Tránzitu no Seguransa Rodoviária halo ona operasaun ba motór elétriku ne’ebé sirkula iha Dili no munisípiu sira.
Operasaun ne’e bazeia ba númeru 3, artigu 120 husi dekretu-lei númeru 6/2003 kona-ba Kódigu Estrada, bainhira hetan lisensa atu lori siklomotór no motosiklu ema ho otas 16 mak bele kondús iha via públika no, tuir regra, tenke uza kapasete no iha karta kondusaun ho kategoria A1.
Iha Fevereiru, DNTT fó sai ona sirkulár hodi bandu menoridade utiliza motór elétriku, nune’e iha sabadu semana kotuk, DNTT ho Polísia Tránzitu halo pasa revista iha estrada públiku iha kapitál Dili parte Komoro nian ne’ebé konsege apreende motór elétriku rua.
Aleinde ne’e, liuhusi operasaun konjuntu ne’e mós DNTT ho Polísia Tránzitu foti motór ne’ebé komete infrasaun hanesan la uza xapa matríkula, no balun monta xapa la tuir regra hamutuk 35, no apreende mós dokumentu komprovativu ba karreta haat tanba viola kódigu estrada.
“Operasaun ne’e ita kontinua halo tanba motór eletriku ne’e barak liu tama husi fronteira Suai no Maliana, kada loron tama ne’e mínimu 8, no sa’e ne’e 10 ba leten, tanba sira besik liu fronteira Indonézia”, Xefe Seksaun Manutensaun Sinál Tránzitu iha DNTT, João da Silva, dehan ba Tatoli, ohin.
Haree kazu ne’e, DNTT serbisu hamutuk ona ho PNTL nune’e sei fó avizu ba munisípiu sira bele kontrola.
Nia husu ba públiku liuliu inan-aman sira labele fó motór elétriku ba oan sira lori bá eskola tanba perigu ba sira-nia vida tanba la uza kapasete no halai kontra regra tránzitu. Solisita mós atu motór elétriku ne’e tenke rejista iha DNTT, nune’e bele hetan xapa matríkula, dokumentu no seluk tan, tanba motór ne’e nia velosidade maka’as to’o 50.
Tuir nia, operasaun daudaun ne’e halo uluk iha estrada públiku iha Dili, maibé iha tempu badak sei tama hotu kada bairru sira. DNTT mós mós fó ona avizu ba autoridade lokál sira atu fó sai informasaun sira ne’e ba iha komunidade no bandu labarik sira utiliza motór elétriku.
Daudaun ne’e motór elétriku barak mak sirkula ona iha Dili no munisípiu sira, maibé seidauk iha ema bá halo rejistu sira-nia, maski sirkulár mós fó sai ona.
“Ami mós sei halo koordenasaun ho MKI no Alfándega atu haree asuntu ne’e. Nune’e motór elétriku sira tama ne’e tenke hetan rejistu no molok hatama tenke hato’o uluk pedidu”, dehan.
Jornalista: Arminda Fonseca
Editora: Maria Auxiliadora
