DILI, 10 Marsu 2026 (TATOLI)—Governu Austrália liuhusi Department of Foreign Affairs and Trade Austrália (DFAT) entrega veíkulu operasionál ida ho marka “Hilux” no “Toyota” ida ba Sekretária Estadu Formasaun Profisionál no Empregu (SEFOPE), ho objetivu atu fasilita servisu melloramentu programa Pacific Austrália Laboral Mobility (PALM) ho di’ak not susesu.
Sekretáriu Estadu Formasaun Profisionál no Empregu, Rogério Araújo Mendonça, hateten ohin hanesan momentu ne’ebé importante tebes ba SEFOPE tanba liuhusi programa PALM, Governu Autrália apoia veíkulu operasionál ida no veíkulu ba membru Governu ida hodi hala’o servisu ho efetivu liután.
“Liuliu veíkulu operasionál nian hodi halo servisu akompañamentu ba reintegrasaun taballadór sira-nia susesu. Enkuantu veíkulu ba membru Governu bele fasilita halo monitorizasaun ba sentru formasaun sira-ne’ebé integra ona iha kada munisípiu no agora ita-nia programa PALM dezentraliza ona to’o iha munisípiu liuhusi portál online PALM hanesan prosesu rekrutamentu, update file no prosesu formasaun,” Sekretáriu Estadu ne’e informa ba jornalista sira iha edifísiu SEFOPE, Kaikoli, ohin.
Governante ne’e dehan, ida-ne’e oinsá atu halo monitorizasaun ba servisu sira iha munisípiu sira presiza tebe-tebes transporte ba melloramentu programa PALM ho susesu.
“Kona-ba veíkulu tuan ne’ebé durante ne’e ha’u uza sei bele ajuda apoia tan ba servisu SEFOPE nia, karik diresaun ruma presiza utiliza bele foti tanba ne’e la’ós ha’u-nia karreta privadu maibé patrimóniu Estadu nia, signifika ba ema hotu,” nia dehan.
Nia hatutan, Governu Austrália apoia buat barak ona ba SEFOPE, hanesan iha 2025 ne’e sira mós oferese veíkulu operasionál balun no iha tinan 2026 apoia tan veíkulu rua, signifika ne’e servisu kooperasaun bilaterál ne’ebé mak iha duni ninia benefísia ba Governu rua ne’e rasik.
Primeira Sekretári Embaixada Austrália, Kalo Tafolo, hateten ida-ne’e hanesan onra boot iha loron ida-ne’e hanesan hatudu dalan ba kooperasaun entre Governu Austrália no Governu Timor-Leste iha programa PALM, nune’e kooperasaun ida-ne’e hatudu kompromisu estratéjiku ne’ebé partilladu, hodi aumenta asesu ba traballadór Timor-Leste to’o 10.000 iha tinan 2028.
Termu entrega karreta ida-ne’e hatudu kooperasaun no kompromisu entre nasaun rua nomós ba moblidade laborál iha Timor, atu hetan metade husi traballadór PALM sira husi traballadór reintegrdu iha Díli no husi munisípiu sira seluk, entaun ne’e hatudu katak Austrália nafatin apoiu SEFOPE atu hetan susesu iha objetivu sira-ne’e.
“Karreta rua ne’ebé ami entrega ne’e ajuda fortalese servisu SEFOPE liuhusi DNEE nia mobilidade operasionál no ajuda ekipa sira ba iha munisípiu sira hodi hala’o servisu monitorizasaun ba programa PALM,” nia dehan.
Aleinde ne’e, nia dehan, Governu Austrália mós apresia ba SEFOPE nia fortelesimentu governasaun no ninia jestaun tanba ne’e sira kompromitidu hakarak kontinua servisu hamutuk no atu serbí hamutuk la’ós de’it liuhusi apoiu hanesan fasilidade maibé mós liuhusi harii kapasidade, fortalese sistema instituisaun ne’ebé bele lori programa PALM forte no kulidade liután ba futuru.
Jornalista : Alexandra da Costa
Editór : Cancio Ximenes
