DILI, 03 Juñu 2026 (TATOLI) — Asia Pacific Foundation of Canada daudau loke hikas ona aplikasaun ba nia Programa Indo-Pasífiku Media Fellows 2026-2027 ba jornalista sira iha rejiaun Indo-Pasífiku, inklui Timor-Leste, ho prazu aplikasaun to’o loron 15 Juñu 2026.
Programa fellowship internasionál ida-ne’e fó oportunidade ba jornalista selesionadu na’in haat atu vizita Kanadá durante másimu semana tolu hodi halo peskiza no estudu komparativu oinsá motiva sira hodi kontribui ba sira idaidak nia nasaun.
Bazaeia ba nota komunikadu ne’ebé Tatoli asesu, informasaun kona-ba fellowship programa ne’e anúnsiu ofisiál, APF Kanadá, programa ne’e halo parte iha estratéjia Indo-Pasífiku Governu Kanadá nian hodi hametin lasu ho nasaun aziátiku sira liuhosi kooperasaun mídia no interkámbiu jornalístiku sira.
“Programa ne’e dezeña atu ajuda jornalista aziátiku sira hetan komprensaun klean liu kona-ba Kanadá no permite sira atu prodús reportajen informativu sira kona-ba relasaun sira Kanadá-Ázia-Pasífiku nian”, refere komunikadu.
Kritériu sira, kandidatu fellowship sira sei presiza prodús pelumenus produtu jornalístiku tolu, inklui konteúdu dijitál ida, kona-ba asuntu estratéjiku sira hanesan seguransa marítima, teknolojia emerjente sira no intelijénsia artifisiál (IA), inovasaun no teknolojia moos, seguransa ekonómika no enerjétika, kadeia fornesimentu, minerál krítiku sira, no tranzisaun enerjétika.
Aleinde ne’e, kandidatu sira presiza dezenvolve estratéjia promosaun ida iha mídia sosiál, kria vídeo badak, podcast ka blog sira, no partisipa iha atividade sira ne’ebé organiza hosi APF Kanadá.
Tuir dokumenru ne’e hateten katak jornalista ida-idak ne’ebé maka selesionadu sei apoiu finanseiru CAD 10,000 hodi kobre gastu sira viajen nian, hela-fatin, no reportajen durante iha Kanadá.
Programa ne’e nakloke ba jornalista sira hosi imprensa, televizaun, rádiu, mídia dijitál, no freelancer sira hosi Ázia Sudeste, Ázia Súl, Ázia Norte, no Ázia Nordeste ho pelumenus esperiénsia jornalizmu tinan rua.
Aplikante sira tenke hatama proposta ida ho liafuan 500 to’o 750 ne’ebé deskreve sira-nia planu kobertura, estratéjia publikasaun, no mídia sira iha ne’ebé obra ne’e sei publika ka transmite. Aplikante sira mós tenke hatama CV, ezemplu sira-nia serbisu jornalístiku, karta apoiu husi editór ka produtór, no planu orsamentu.
Aplikasaun no pergunta hotu-hotu kona-ba programa bele haruka liuhosi email ba applications@asiapacific.ca. APF Canada simu aplikasaun sira iha Inglés no Fransés, ho loron ikus ba aplikasaun sira maka 15 Juñu 2026, iha tuku 11:59 PM Oras Pasífiku Kanadá nian.
Antes ne’e, Embaixadór Kanadá nian iha Timor-Leste, Jess Dutton, mós enkoraja jornalista timoroan sira atu aproveita oportunidade ne’e hodi habelar informasaun internasionál, hametin kapasidade jornalístika, no harii rede mídia globál hafoin Timor-Leste ofisialmente sai membru plenu ba ASEAN.
Tuir nia, númeru aplikante husi Timor-Leste to’o agora limitadu tebes, tanba ne’e Embaixada Kanadá hakarak hasa’e partisipasaun jornalista nasionál sira iha programa ne’e.
Jornalista: Arminda Fonseca
Editór: Evaristo Soares Martins
