VIKEKE, 10 Marsu 2026 (TATOLI)—Koordenadór Infraestrutura Ministériu Obra Públika (MOP) Munisípiu Vikeke, Mário Ângelo Menezes, informa kontrusaun ponte Uelolo, Suku Luka, Postu Administrativu Vikeke Vila, Munisípiu Vikeke, daudaun ne’e empreza responsavel hahú konstrui ona ai-riin ponte nian.
“Obra konstrusaun ponte Uelolo responsabiliza husi empreza Nananiu Engineering & Construction Company Unipessoal, Lda, hahú fulan-Dezembru 2025. Empreza destaka ona sira-nia ekipamentu bá terrenu, maibé kondisaun klima (udan) entaun labele implementa. Nune’e, konstrusaun ponte Uelolo hahú implementa fali iha Janeiru 2026. To’o agora progresu fíziku atinje ona 6,34%”, Mário Ângelo Menezes ba TATOLI iha ninia kna’ar fatin, Vikeke, Tersa ne’e.
Nia klarifika udan mak difikulta empreza sira hodi aselera serbisu tanba udan ona mota tun sempre hamosu sedimentasaun, entaun empreza tenke halo normalizasaun lai, depoiz kontinua servisu.
Iha fatin ketak, Xefe Aldeia Uma-Boot, Suku Luka, Jeremias Marques, informa daudaun ne’e empreza Jonize ninia traballadór sira sei servisu hela, maibé udan mota tun ne’e mak difikuta sira-nia servisu.
“Ami akompaña servisu kontrusaun ponte Uelolo. Agora servisu la’o hela. Maibé, udan ne’e mak sempre difikulta servisu. Ami hakarak ponte hotu lalais hodi fasilita ami-nia movimentu sira, tanba durante ne’e ponte laiha sempre difikulta ami-nia viajen bá munisípiu,” nia haktuir.
Entretantu, ponte Uelolo lansa diretamentu husi Primeiru-Ministru (PM), Kay Rala Xanana Gusmão, iha fulan-Outubru 2025.
Projetu ponte Uelolo ne’e ho númeru kontratu SSS/118/MOP-2025, superviziona husi Ministériu Obra Públika (MOP), sei gasta orsamentu hamutuk $4.398.863,24, ho durasaun servisu loron 365. Tuir dadus, populasaun Luka ne’ebé hela pertense ba área Uelolo ho totál hamutuk 2.455.
Jornalista: Vitorino Lopes da Costa
Editór: Xisto Freitas da Piedade
