MNEK-JICA realiza semináriu kona-ba planu estratéjiku komunidade sosiu-kulturál ASEAN
DILI, 10 Marsu 2026 (TATOLI)–Governu liuhusi Ministériu Negósiu Estranjeiru no Kooperasaun (MNEK) hamutuk ho Ajénsia Kooperasaun Internasionál Japaun (JICA, sigla inglés), tersa ne’e, realiza semináriu durante loron rua (2) hahú ohin no kuarta (11 Marsu) aban, hodi ko’alia kona-ba planu estratéjiku komunidade sosiu-kulturál ASEAN nian.
Vise-Ministra ba Asuntu ASEAN, Milena Rangel, hateten semináriu ne’e ho objetivu atu fó orientasaun abranjente kona-ba planu estratéjiku ASEAN Socio-Cultural Community (ASCC) no fasilita aliñamentu polítika nasionál ho prioridade kooperasaun rejionál.
Semináriu ne’e sei permite mós organizasaun ba planu estratéjiku no definisaun ba indikadór prinsipál sira dezempeñu nian, foka ba aliñamentu programa ASEAN nian no hatán ba dezafiu globál sira.
“Ami sei dezenvolve ezersísiu mapeamentu regulár ida hodi aliña ami-nia programa dezenvolvimentu nasionál, ne’ebé kobre área sira hanesan redusaun pobreza, igualdade jéneru, empoderamentu juventude no kobertura saúde universál iha ASEAN,” Milena hateten ba jornalista sira iha edifisiu MNEK, Avenida Portugál, ohin.
Timor-Leste iha intensaun atu koloka-an la’ós de’it nu’udar partisipante maibé mós nu’udar kontribuinte proativu ba kooperasaun rejionál.
Iha fatin hanesan, Embaixada Japaun iha Timor-Leste, Sakai Yuki, destaka importánsia husi semináriu ne’e hodi subliña katak inisiativa ne’e konstitui plataforma ida-ne’ebé iha valór hodi hametin integrasaun nasaun nian iha ASEAN.
Tuir diplomata ne’e, ASCC tau ema iha sentru dezenvolvimentu nian, promove progresu umanu, reziliénsia no inkluzaun.
Atividade ida-ne’e hanesan oportunidade di’ak ida atu aliña Timor-Leste nia prioridade sira ho ASCC nia objetivu sira, no atu hamutuk planeia pasu konkretu sira hodi fó benefísiu ba timoroan sira.
Sakai Yuki subliña, apoiu kontínuu Japaun nian ba Timor-Leste nia adezaun ba ASEAN, destaka mós kompromisu nasaun nian ba kooperasaun rejionál no seguransa umanu no subliña importánsia atu aliña Timor-Leste nia prioridade nasionál sira ho ASCC nia objetivu sira, promove dezenvolvimentu umanu, reziliénsia no inkluzaun sosiál.
Diplomata ne’e hato’o esperansa katak semináriu ne’e sei kontribui hodi hametin Timor-Leste nia partisipasaun iha ASCC, repete Japaun nia kompromisu ba kooperasaun kontinua ho nasaun ne’e.
JICA Senior Project Advisor, Yuji Ono, esplika semináriu ne’e halo parte iha inisiativa sira-ne’ebé aborda tópiku oioin ne’ebé relasiona ho ASEAN, no ho objetivu atu fó koñesimentu ba ofisiál timoroan sira kona-ba planu estratéjiku asosiasaun nian no área prioridade sira.
“Planu Estratéjiku ASCC destaka nu’udar roteiru abranjente ida hodi promove komunidade ida-ne’ebé reziliente, inovativu, dinámiku no sentradu iha ema, ne’ebé foka ba sidadaun nia moris di’ak. Protesaun ba direitu umanu no promove asesu ekuitativu ba oportunidade sira iha área edukasaun, saúde, empregu no protesaun sosiál,” nia dehan.
Jornalista : Hortencio Sanchez
Editór : Cancio Ximenes
