DILI, 11 Marsu 2026 (TATOLI)– Sekretáriu Jerál Organizasaun intergovernamentál g7+, Helder da Costa Guterres, hasoru malu ho Embaixadora Repúblika Kosta Marfim iha Portugál, Annick Josiane Capet Bakou, hodi informa kona-ba misaun prinsipál organizasan g7+ nian.
Tuir nota ne’ebé Agência TATOLI asesu ne’e haktuir, enkontru entre parte rua (2), Sekretáriu Jerál informa ba Embaixadora kona-ba dezenvolvimentu xave no prioridade sira ba g7+ iha tinan oin mai.
Ida-ne’e inklui atualizasaun ida kona-ba lansamentu Sentru Resposta Rápida nian durante Asembleia Jerál Nasaun Unida nian iha Setembru 2025 liu ba, no mós atualizasaun institusionál sira kona-ba Prezidente no Vise-Prezidente foun sira g7+ nian.
Iha sorumutuk ne’e, Embaixadora mós hetan informasaun kona-ba misaun sira g7+ nian ne’ebé sei mai iha Libéria no Repúblika Demokrátika Kongo, ne’ebé marka ona ba fulan-Marsu, ne’ebé sei inklui kompromisu sira ho ofisiál sira Governu nian ho nivel aas no parte interesada prinsipál sira.
Iha parte seluk, Sekretáriu Jerál hato’o nia parabéns ba nomeasaun Nialé Kaba, Ministra Estadu no Ministra Negósiu Estranjeiru no Kooperasaun Internasionál Repúblika Kosta Marfim nian.
Ministra Kaba uluk serbisu nu’udar Ministra Planeamentu no Dezenvolvimentu Kosta Marfim nian, no nia lideransa sai instrumentál hodi asegura kompras polítika ne’ebé maka’as ba serbisu g7+ nian hodi promove harii dame no harii Estadu.
Sekretáriu Jerál konvida Embaixada atu partisipa iha g7+ Peace Cup ne’ebé sei mai, torneiu futsál ida-ne’ebé marka ona ba loron 01 fulan-Agostu tinan 2026 iha Lisboa, hodi enkoraja formasaun ekipa ida atu reprezenta Kosta Marfim.
TATOLI
