Inan ne’ebé abandona nia oan iha HNGV entrega-an ba PNTL
DILI, 11 Marsu 2026 (TATOLI)—Polísia Nasionál Timor-Leste (PNTL) liuhusi Eskuadra Kristu Rei asegura ona inan ho inisiál JRO, ne’ebe abandona bebe feto ho kondisaun Hidrosefalus, iha Kuidadu Intensivu Hospital Nacional Guido Valadares (HNGV) durante semana tolu nia laran.
JRO bá iha HNGV nomós entrega-an ba Polísia Eskudra Kristu Re, ha Kuarta ne’e maizumenus tuku 06:00 dadeer.
“Horisehik buka tuir ninia paradeiru hetan ona, entaun iha madrugada, inan ne’e rasik entrega nia-an, entaun inan ne’e bá ona ospitál, parte ospitál hasoru kedas nia no nia oan iha ne’ebá. Entaun kontinua hodi kedas nia ka suspeita mai Eskuadra hodi kanaliza ba VPU (Vulnerable Person Unit ka Unidade Pesoal Vunerável) Munisípiu Dili para kontinua ba prosesu,” Komandante Eskuadra Kristu Rei, Inspetór Xefe Polísia Paulino de Carvalho, hato’o ba Jornalista sira iha ninia knaar fatin, Bekora, Kuarta ne’e.
Nia dehan, maski inan husi bebe entrega-an ona ba Autoridade Seguransa maibé to’o ohin loron seidauk hetan bebe nia aman.
“Kona-ba bebe nia aman ha’u seidauk hatene, tanba ne’e prosesu investigasaun iha VPU Munisípiu Dili,” nia akresenta.
Notísia relevante : PNTL identifika ona suspeita abandona bebe feto iha HNGV
Inspetór Polisia ne’e haktuir katak, bebe nia inan entrega-an hafoin akompaña notísia ne’ebe fó sai husi mídia sira no diskusaun iha rede sosiál.
“Bebe nia inan ne’e voluntáriamente entrega-an tanba nia mós horikalan akompaña notísia ne’ebé ita publika, entaun iha dadeersan ne’e ita hetan ona nia paradeiru,” Inspetór katak.
Nia esplika, kazu ne’e rasik prosesu iha hela identifikasaun, nune’e bele hatene kauza loloos.
“Prosesu hotu, primeiru ita halo lai identifikasaun hodi hatene konteúdu nia problema oinsá mak to’o nia husik hela ninia oan rasik, entaun ho situasaun sira ne’e parte VPU mak sei bele kanaliza iha Ministériu Públiku,” nia tenik.
Nune’e, Ministériu Públiku (MP) mak sei deside karik iha nesesidade atu dezenvolve kazu ne’e ba oin.
“Kauza ida-ne’e orsida iha desizaun Ministériu Públiku mak hatene kle’an liu, ita labele ko’alia ema nia privasidade, buat hotu segredu, entaun ida-ne’e so Ministériu Públiku to’o iha Tribunál mak hatene nia variedade, direitamente nia hatene ona saida mak nia halo,” nia katak.
Parte VPU hafoin rekolla informasaun sei komunika ho MP no Polísia Eskuadra Kristu Rei hodi prosede ba prosesu tuir mai.
“Saida mak horiseik ha’u ko’alia katak iha 24 oras de tempu suspeita ne’e entrega-an, mas la to’o 24 oras tanba ho situasaun sira ne’e hotu ho ha’u-nia esforsu tan de’it bebe ne’ebé iha ospitál, agora paradeiru ninia inan iha ona ita-nia liman,” nia hato’o.
Jornalista : Natalino Costa
Editora : Julia Chatarina
