DILI, 11 Marsu 2026 (TATOLI)—Xefe Seksaun Bee Timor-Leste, Empreza Públika (BTL, E.P) iha Ministériu Obrá Públika, João Gomes, informa prosesu konstrusaun drainajen D4 husi Portu Dili ba Kaikoli daudaun ne’e atinje 51,34%, tanba empreza monta ona Reinforced Concrete Box Culvert (RCBC) ka estrutura beton ba drainajen.
Daudaun ne’e empreza monta ona RCBC ho nia naruk metru 130 no kuazé hela RCBC nia naruk metru 270 mak seidauk monta, tanba totál loloos RCBC nia naruk ne’e hamutuk metru 400.
“RCBC sira seidauk monta hotu ne’e tamba ita servisu haree ba mós pasang surut tasi nian, bee iha rai-okos. Maske ladun iha problema maibé infrenta mós eletrisidade ho kondisaun klima udan. Eskavatór mós ke’e materiál balun ne’ebé to’os, entaun servisu tenke la’o logos. Maibé, traballadór sira kontinua halo servisu ho normal,” Xefe seksaun ne’e informa ba Agência Tatoli, ohin.
Nia dehan, empreza sira servisu monta RCBC iha de’it tempu kalan, tanba prosesu konstrusaun ne’e barullu hodi rezulta rai nakdoko entaun bele fó impaktu impedimentu ba atividade servisu liuliu edifísiu mós barak iha área refere, nune’e iha tempu loron sira halo las de’it servisu cor RCBC nia laran, halo solda joing RCBC.
Nia hatutan, maske enfrenta problema maibé empreza konsege servisu ona durante fulan lima ho balun no nia garante katak projetu ne’e bele konklui antes ramata kontratu ba tinan ida.
Entretantu, projetu ne’e implementa husi empreza Carya Timor-Leste (BTK) ho durasaun tempu tinan ida.
Notísia Relevante: Governu garante 99% bele rezolve inundasaun iha Dili liuhusi drainajen D4
Jornalista : Alexandra da Costa
Editór : Cancio Ximenes
