DILI, 11 Marsu 2026 (TATOLI) – Proposta lei númeru 26/VI(3a) – Partidu Polítiku nian obriga forsa polítika sira ne’ebé daudaun eziste no atu halo inskrisaun foun tenke iha sede iha munisípiu sira hotu.
Prezidente Komisaun A ne’ebé trata Asuntu Konstitusionál no Justisa, Natalino dos Santos, iha ámbitu finaliza dikusaun lei ne’e iha faze espesialidade, hateten proposta lei ne’e Governu aprezenta atu halo alterasaun ba lei vijente iha artigu hitu, ho hanoin atu avansa ba eleisaun podér lokál. Ho alterasaun ne’e atu haree ba sede partidu sira tenke iha munisípiu sira.
“Sede iha ne’ebá atu halo atividade polítika, planu no programa partidu nian, diskute, fó formasaun edukasaun sívika no polítika, tanba partidu polítiku órgaun importante iha Timor-Leste, nu’udar Estadu direitu demokrátiku, demokrásia la’o, partidu tenke funsiona iha kondisaun”, nia hateten.
Lei ne’e mós atu regula partidu foun sira ne’ebé hakarak halo inskrisaun labele uza símbolu istóriku no nasionál sira no atu sai dirijente partidu tenke rezide iha rai-laran.
Iha espesialidade, iha dinámika diskusaun, deputadu sira hamosu tan artigu ida kona-ba partidu polítiku sira la kumpre maka sei iha sansaun finanseira no administrativamente.
“No aditamentu halo proibisaun obriga ema atu tama ba partidu ka obriga organizasaun ida atu hal afiliasaun, ne’e liberdade direitu garantia”, dehan.
Durante diskusaun naruk ba proposta ida ne’ebé aprezenta kona-ba inskrisaun partidu foun iha asinatura husi ema rihun 20 ne’ebé kada munisípiu iha rihun ida prevee iha lei vijente atu hasa’e ba rihun 30. Pedidu ne’e hato’o husi sosiedade sivíl, Komisaun Nasionál Eleisaun (CNE, sigla portugés) no partidu polítiku sira ne’ebé hetan asentu iha Parlamentu.
“Maibé, deputadu sira haree eleitór no país ne’e ki’ik, entaun razoavel hela atu mantein regra ba inskrisaun partidu ho asinatura ema rihun 20, nune’e proposta ne’e hakat ba votasaun la pasa”, salienta.
Notísia relevante: Alterasaun Lei Partidu Polítiku aprova ona iha faze jeneralidade
Jornalista: Nelson de Sousa
Editora: Maria Auxiliadora
