DILI, 11 Marsu 2026 (TATOLI)—Motorista bus Taro 21 diresaun Maliana-Dili, Henrique Sebastião Naes Araújo, preokupa ho presu kombustível ne’ebé sa’e iha Estasaun Kombustível sira tanba bele fó impaktu ba sira-nia rendimentu tula pasajeiru viajen husi Maliana mai Dili ka ba-mai.
“Daudaun ne’e presu mina folin sa’e. Kuazé ha’u survei ona iha Sentru Kombustível sira-ne’ebé antes ne’e ho presu $1,34 maibé agora sa’e ba $1,45. Ida-ne’e afeta ba ami-nia rendeimentu loro-loron nian,” motorista ne’e informa ba Agência Tatoli, ohin.
Nia dehan, folin mina sa’e ne’e difikulta tebes sira-nia rendimentu tanba afeta mós bai ha presu pasajeiru nian ne’e sira mantein kada ema ida selu $6, maibé se sira hasa’e presu ba pasajeiru sira lakohi sa’e ona bus.
“Ami-nia jestaun di’ak mak presu nafatin maibé buka mak pasajeiru maizumenus ema na’in-15 ba leten, karik ema na’in-10 de’it ne’e ita sei lahalo viajen,” nia dehan.
Nia dehan, tanba kada viajen sira tenke ense mina to’o $90 ho situasaun mina folin sa’e ne’e dalaruma sira bele ense kombustivél to’o $100, entaun rendimentu menus tanba bainhira pasajeiru ladun iha, signifika motorista dalaruma uza osan rasik hodi konsumu no ense kombustível ba veíkulu.
“Ami mós la’ós hasoru difikuldade ida-ne’e de’it maibé kondisaun klima udan, pasajeiru ladun barak halo viajen. Tanba, baibain ami tula barak liu mak husi suku Leo-Hitu no Cova. Entaun bainhira udan sira labele halo movimentu ba sira-nia fatin, nune’e di’ak ida ami tula de’it na’in-14 no Maliana na’in-ualu (8),” nia dehan.
Maske nune’e, nia dehan, sira nafatin halo operasaun ba mai tanba ida-ne’e mak sira-nia servisu loro-loron hodi sustenta ekonomia finanseiru família nian.
Iha biban ne’e mós tuir motorista kamioneta bis Sport, Mozinho de Jesus, hateten maske presu mina sa’e maibé sira kontinua halo operasaun hodi tula pasajeiru sira-ne’ebé hakarak hala’o viajen Dili ba Maliana no Maliana mai Dili.
“Presu mina sa’e maibé ami nafatin mantein presu ba pasajeiru sira, tanba ami-nia mina ense direta iha sira-nia fatin, entaun presu baratu to’o $70 ne’e tanke nakonu ona. Importante mak ami-nia jestaun di’ak hodi buka pasajeiru sira atu prienxe kadeira to’o nakonu, tanba maneira ne’e sei bele ajuda ita-nia rendimentu maske mina folin sa’e,” nia dehan.
Maibé, nia afirma, bainhira pasajeiru uitoan de’it ne’e sira preokupa tebes tanba ne’e motorista tenke hasai rasik nia osan hodi selu hahan ba nia no ninia asistente motrista (konjak).
Aleinde ne’e mós hodi ense mina tanba jestór ka na’in ba veíkulu ne’e hatene simu rezultadu, entaun rendimentu sira-ne’e entrega kedas la hein to’o fulan mak entrega ba jestór.
Jornalista : Alexandra da Costa
Editór : Cancio Ximenes
