DILI, 11 Marsu 2026 (TATOLI)—Prezidente Komisaun F Parlamentu Nasionál (PN) ne’ebé mak trata Asuntu Saúde, Seguransa Sosiál no Igualidade Jéneru, Maria Gorumali Barreto hateten Parlamentu Nasionál liuhusi Komisaun F hala’o vizita bá Institutu Nasionál Farmásia, Produtu no Médikamentu (INFPM) hodi haree direta kondisaun ai-moruk ne’ebé mak rai iha armazein sentrál.
“Tama 2026 foin primeiravez ami vizita INFPM hodi haree liubá kondisaun ai-moruk ne’ebé mak tuir sira-nia lista inklui mós item sira-ne’ebé mak eziste iha ita-nia rai-laran,” Maria Gorumali Barreto ba jornalista sira iha Salaun INFPM, Kampu Alor, Kuarta ne’e.
Nia dehan, item sira-ne’ebé mak iha ne’e estoke balun disponivel no balun stock out.
“Entaun, husi dadus ne’ebé mak ami hetan katak iha ita-nia nasaun iha ai-moruk item 1.407 no ai-moruk ne’ebé mak disponivel ne’e hamutuk 68 %, no ai-moruk ne’ebé mak stock out hamutuk 32 %. Siginifika katak stock out mós iha nia persentajen aas,” Gorumali esplika.
Nia haktuir, husi responsavel sira-nia esplikasaun katak sei hatama tan medikamentu tanba iha INFPM nasionál só simu ai-moruk mai nia depoiz nia kontinua halo distribuisaun ba INFPM rejionál sira.
“Tanba ne’e mak nia afeta ba kondisaun ai-moruk. Iha-ne’e balun ne’ebé ho nia persentajen ne’ebé maka hatudu stock out. Agora ita atu hatene liu fali kondisaun ai-moruk iha rejionál inklui mós iha munisípiu ne’ebé mak kobre iha rejionál tolu ne’e, ida rejionál Baucau, Maliana no Ainaru, orsida bá fali Munisípiu mak ita bele hatene liu kondisaun ai-moruk ne’ebé mak iha,” nia esplika.
Nia tenik, agora iha Institutu Nasionál Farmásia, Produtu no Médikamentu iha liña koordenasaun ho Diresaun Nasionál Farmásia Produtu no Médiku ne’ebé mak eziste iha Ministériu Saúde.
Iha fatin hanesan, Diretora Ezekutiva INFPM, Paulina Mendonça informa loos duni stock einjerál ne’ebé hanesan ohin distinta deputada Komisaun F hato’o katak estoke disponivel hamutuk 68% no stock out hamutuk 32%.
Nia hatutan estoke ai-moruk ne’ebé maka daudaun ne’e iha Institutu Nasionál Farmásia, Produtu no Médikamentu ne’e sei garante to’o fulan ida, maibé ai-moruk kontinua tama iha armazein nasionál hodi responde ba stock out ne’ebé mak iha.
“Ida-ne’e estoke ai-moruk normál hela. Ita bele garante fulan ida resin. Agora mai halo hela ezersísiu. Aban ka bainrua sasán bele tama ona mai hodi responde ba nesesidade,” nia konklui.
Jornalista : Felicidade Ximenes
Editór : Cancio Ximenes
