Programa hitu iha Baguia aprovadu liuhusi reuniaun ASPA
BAUKAU, 11 Marsu 2026 (TATOLI)—Membru Konsellu Postu liuhusi reuniaun Asembleia Postu Administrativu (ASPA) aprova programa hitu ne’ebé konsideradu prioridade iha Postu Administrativu Baguia.
Administradór Postu Administrativu Baguia, Mário Xavier da Silva esplika reuniaun Asembleia Postu Administrativu realiza ona iha finde Janeiru tinan ne’e ho ajenda aprovasaun ba programa ne’ebé sai proposta antes enkamiña ba autoridade munisipál tanba konsideradu prioridade.
“Ita-nia esperansa hetan aprovasaun liuhusi reuniaun Konsellu Koordeansaun Munisipál iha Autoridade Munisipál,” Administradór Postu Baguia hateten iha Sentru Konvensaun Baukau (CCB-sigla portugeza) Vila Antiga, Kuarta ne’e.
Mário da Silva relata proposta referida kompostu husi reabilitasaun estrada diresaun Postu Baguia Vila bá Suku Afaloikai, merkadu postu administrativu lokaliza iha Suku Alawa Kraik, konstrusaun kampu futeból, reabilitasaun rezidénsia Administradór, morru protesaun edifísiu administradór no merkadu iha Suku Lavateri.
Nia subliña entre proposta hirak-ne’e, importante liu mak infraestrutura bázika hanesan estrada ne’ebé ensisiál atu Governu tau-atensaun nune’e transporta produtu bá merkadu.
Aleinde ne’e, Mário hatutan, proposta seluk mak merkadu postu tanba sai fatin konsentrasaun ba atividde ekonomia fa’an no sosa mezmu maioria proposta sira-ne’e sempre falla iha nasionál liuhusi Komisaun Revizaun Orsamentál (KRO).
“Ita sempre lori proposta bá munisípiu no kontinua ba nasionál maibé dalaruma aprova de’it rua,” Mário da Silva akresenta.
Postu administrativu Baguia iha tinan-ne’e hetan projetu rua hanesan konstrusaun merkadu iha Suku Ossohuna inklui postu saúde no rezidénsia pesóal saúde iha Suku Afaloikai ne’ebé sei iha faze aprovizionamentu.
Entretantu, realizasaun reuniaun ASPA bazeia ba Dekretu-Lei númeru 84/2023 alterasaun ba dalimak husi Dekretu-Lei númeru 3/2016 kona-ba estatutu administrasaun, autoridade munisipál no grupu serbisu interministeriál kona-ba estabelesimentu desentralizasaun administrativa bazeia ba diploma ministeriál númeru 50/2016, kona-ba regra funsionamentu asembleia postu administrativu.
Jornalista: Natalino Belo
Editór: Xisto Freitas da Piedade
