DILI, 11 Marsu 2026 (TATOLI)–Diretór Nasionál Patrimóniu Lojístika no Infraestrutura iha Ministériu Juventude, Desportu, Arte no Kultura (MJDAK), Abel de Jesus Andrade, informa tempu besik Governu sei sobu mini kampu futeból, kampu basketból no voleiból praia iha Lecidere, Dili.
“Mini kampu futeból, kampu voleiból praia no kampu basketból iha Lecidere atu sobu tanba Governu asina ona akordu kontratu ho empreza Dili One atu harii sentru konvensaun ida iha ne’ebá hodi prepara ba Timor-Leste, atu sai uma-na’in ba ASEAN iha tinan 2029,” Diretór ne’e hateten ba TATOLI iha edifisiu MJDAK, Lecidere, ohin.
Nia dehan, MJDAK enkontru ona ho empreza Dili One, parte Terra Propriedade hodi identifika fatin seluk hodi harii hikas kampu tolu (3) ne’e.
“MJDAK enkontru ona ho empreza Dili One, Terra Propriedade atu buka fali fatin balun hodi harii fali kampu tolu (3) ne’e. Kampu tolu (3) ne’e ita identifika ona fatin iha Sede Suku Bidau nia oin iha tasi ibun ne’ebá, ponte Prezidente BJ Habibie nia sorin, atu harii fali kampu sira iha ne’ebá. Terra Propriedade aseita ona maibé konstrusaun ne’e sei iha prosesu tanba ita tenke tau orsamentu iha tinan oin liuhusi prosesu naruk uitoan. Maibé, kona-ba rai ne’e loos ona, ita sei harii fali kampu sira iha ne’ebá,” nia dehan.
Nia hatutan, bainhira empreza ne’ebé atu konstroi sentru konvensaun foun ne’e atu hala’o servisu sobu kampu tolu ne’e, materiál hotu iha ne’ebá sei asegura hotu iha edifisiu MJDAK.
“Sasán sira iha kampu ne’ebá bainhira empreza sobu sei lori mai tau hotu iha edifisiu MJDAK nian, bainhira halo fali kampu foun ita utiliza fali de’it, atu nune’e labele estraga tan osan ba sosa buat hirak ne’e,” nia hateten.
Bainhira atu harii kampu foun iha fatin ne’ebá MJDAK sei servisu hamutuk tan ho Ministériu Obra Públika (MOP) hodi sukat rai, halo dezeiñu hafoin tau orsamentu hodi halo konstrusaun.
“Ita muda kampu ida ba fali fatin seluk ne’e la fasíl, tékniku husi parte rua (2) MJDAK, MOP sei ba sukat hodi hatene nia orsamentu hira mak gasta no buat lubuk ida,” nia dehan.
Rekorda fali katak, kampu mini-futeból Lesidere iha tinan 2022 hetan apoiu orsamentu husi Governu Xina ho orsamentu hamuk $300.000 ba reabilitasaun kampu referidu.
Xina nia pozisaun ne’e, hodi hatudu nia apoiu ba dezenvolvimentu desportu lokál. Inisiativa ne’e halo parte iha fortalesimentu husi kooperasaun bilaterál ne’ebé destaka husi Prezidente Ramos-Horta iha konversa sira kona-ba dezenvolvimentu nasaun nian.
Jornalista : Hortencio Sanchez
Editór : Cancio Ximenes
