Adidu Edukasaun Bali klarifika estudante na’in-tolu hakotu-iis tuituir malu iha Malang
DILI, 12 Marsu 2026 (TATOLI)—Asistente Adidu Edukasaun Destakadu iha Konsul Jerál Bali sesante, José Maria Gonçalves, klarifika estudante na’in-tolu mate tuituir malu iha Malang, Java Leste, Indonézia.
“Estudante na’in-tolu ne’e estuda iha Universitas Islam Malang (UNISMA), hela iha kós li’ur, la’ós iha kós universidade nian. Sira mate tanba moras,” Asistente Adidu dehan ba TATOLI, via WhatsApp, Kinta ne’e.
Asistente José haktuir estudante ne’ebé maka mate iha Malang, tinan 2024 ho naran Jolino Manuel dos Santos Pereira. Estudante ne’e foti Fakuldade Tékniku Sivíl, husi Munisípiu Likisá, mate 01 Novembru 2024. Matebian baixa iha ospitál universidade nian (UNISMA) 28 Outubru to’o 30 Outubru 2024.
Motivu husi mate ne’e tuir deklarasaun husi doutór katak nia hetan moras malária ++ baixa iha ospitál kalan rua (2), maibé kondisaun matebian seidauk rekuperadu, nia rasik husu ba doutór atu fila bá uma, doutór la autoriza, maibé nia obriga doutór autoriza fila ba kós.
Depoiz iha 31 Outubru 2024, moras ataka fali, matebian fila bá baixa Ospitál UNISMA iha oras 11:00, maibé iha oras 02: 35 madrugada matebian hakotu nia iis durante baixa iha Ospitál UNISMA.
“Prosesu transladasaun mate-isin mai Timor-Leste, ha’u rasik bá Malang halo koordenasaun ho Konsul Jerál Bali, Imigrasaun, Universidade, Ospitál, Polísia no Klibur Estudante Timoroan iha Malang no Imigarasaun hodi halo prosesu transladasaun mate-isin to’o mai iha Timor-Leste, entrega bá família hodi halo prosesu fúnebre,” José esplika.
Nune’e mós, iha fulan-Jullu 2025, estudante Lizio Monteiro da Costa, husi Munisípiu Lautein, estuda iha UNISMA, Fakuldade Téknika, Departamentu Arsitektura, hakotu-iis tan.
“Durante semana ida nia moras, família haruka fila bá Timor-Leste, matebian mate iha Dili. Motivu husi mate iha Dili ha’u lahatene,” nia dehan.
Aleinde ne’e, estudante Nélson Gonçalves dos Santos, husi Munisípiu Likisá, estuda iha Universidade Islam Malang (UNISMA), foti Fakuldade Ekonomia, Departamentu Jestaun, mós hakotu-iis iha tinan ida-ne’e (2026).
“Ida-ne’e nia motivu mate ha’u lahatene. Tanba ha’u-nia mandatu termina iha 31 0utubru 2025. Tuir informasaun husi Klibur Estudante iha Malang katak nia filamai Timor- Leste mak moras, hakotu nia iis iha 10 Marsu 2026,” nia haktuir.
Iha parte seluk, Ministru Ensinu Superiór, Siénsia no Kultura, José Honorio Pereira da Costa Jerónimo, informa tuir informasaun husi universidade estudante timoroan na’in-tolu mak mate, maibé mate tanba moras, la’ós tanba buat seluk.
Governante ne’e hatutan estudante na’in-tolu ne’e nia mate dalaruma tratamentu la másimu ba sira-nia moras.
“Ha’u hanoin sira mate laiha relasaun ho buat seluk, maibé sira moras kauza husi menus halo tratamentu ne’ebé másimu. Maibé, ida-ne’ebé foin mate ne’e mai kle’ur ona, enkuantu rua seluk mak mate iha Malang,” ministru esplika.
Nia informa, ida mate iha tinan-2024, nia parte oriente kedas Adidu Edukasaun iha Bali ba iha-ne’ebá hodi fó apoiu hodi lori hikas matebian mai Timor-Leste.
Govenante ne’e hatutan estudante na’in-tolu ne’e orijinalidade husi Munisípiu Likisá na’in-rua no ida husi Munisípiu Lautein. Aleinde ne’e, estudante na’in-tolu ne’e la’ós ba hanesan bolsu estudu husi Governu, maibé sira ba hanesan bolsa parsiál.
“Sira bá liuhusi bolsa parsiál ne’ebé oferese husi Pusat budaya Indonézia (PBI), maibé sira hanesan estudante entaun ita fó apoiu,” José Honorio esklarese.
Iha biban ne’e, Ministru José Honório apela ba estudante timoroan ne’ebé estuda iha estranjeiru, atu foku ba estuda no kuidadu saúde no hadook an husi ransu livre.
“Ita ba ema-nia rai han tenke kuidadu, tanba ema nia klima diferente ho ita-nian, tanba se ita ko’alia iha universidade Malang ne’e klima malirin. Tan ne’e, sira tenke kuidadu saúde, estuda ho di’ak no karik moras tenke informa ba inan-aman,” nia konklui.
Jornalista: Osória Marques
Editór: Xisto Freitas da Piedade
