DILI, 12 Marsu 2026 (TATOLI)—Diretór Ezekutivu Aero Dili, Lourenço de Oliveira, informa Aero Dili hapara provizóriu voo ba Oekusi no Singapura tanba daudaun ne’e folin mina sa’e.
“Daudaun ne’e operasaun voo ba Oekusi sei hapara provizóriu tanba kondisaun folin mina sa’e 100%. Se ha’u ense de’it mina tula pasajeiru na’in-20 de’it ba Oekusi, entaun ita labele hetan rendimentu ruma. Karik pasajeiru 100-resin ne’e di’ak, satán presu $25-$30 ne’e ita la cover buat ida. Tanba ne’e, ne’e ha’u deside operasaun ba Oekusi para lai, karik ita haree presu mina tuun mak ita sei kontinua halo voo,” nia informa ba Agência Tatoli liuhusi programa “Entrevista Eskluziva” iha estúdiu, Faról, ohin.
Nune’e mós, nia dehan, operasaun vou ba Singapura mós hapara sirkulár provizóriu tanba presu mina sa’e.
Espansaun voo internasionál depende ba kresimentu merkadu
Aleinde ne’e, nia hateten, espansaun voo internasionál depende ba kresimentu merkadu no númeru pasajeiru.
Diretór ne’e deklara, atu halo espansaun voo internasionál ba nasaun ASEAN sira seluk depende ba kresimentu merkadu, se iha merkadu iha ne’ebá entaun prontu atu envolve katak bazeia ba númeru viajen ka destinasaun ida-ne’ebé mak barak liu ema halo movimentu ba.
“Pasajeiru timoroan barak ne’ebé servisu iha nasaun Europa mak tranzit iha Singapura, Malázia no Bali, entaun ida ne’e mak ita bolu dehan kresimentu merkadu. Maibé karik ita hakarak espansaun voo direta ba nasaun Europa ita presiza iha aviaun ne’ebé medida boot liután, mínimu hanesan airbus,” nia informa ba Agência Tatoli liuhusi programa “Entrevista Eskluziva” iha estúdiu, Faról, ohin.
Nia mós dehan, atu atrai investimentu presiza mellora mós fasilidade aeroportu tuir kritéria ICAO, tanba aeroportu sai sentru entrada investimentu setór ekonomia.
Jornalista : Alexandra da Costa
Editór : Cancio Ximenes
