BAUKAU, 12 Marsu 2026 (TATOLI)—Autoridade Munisipál Baukau (AMB) kontinua esforsu solusiona polémika Suku Uaitame ne’ebé durante ne’e mosu intensaun hakarak reintegra ba Postu Administrativu Kelikai.
Prezidente Autoridade Munisipál (PAM) Baukau, Veneranda Eurico Lemos Martins esplika polémika referida kona-ba estatutu suku ne’ebé hamosu prekupasaun husi komunidade iha Uaitame, iha-ne’ebé problema ne’e mosu tanba kestaun komunikasaun, nune’e AMB sei kontinua halo diálogu ho komunidade tanba ema hotu tenke iha espíritu kolaborasaun ba dezenvolvimentu.
“Suku Uaitame sei iha prosesu ida iha-ne’ebé ami tenke filafali ba ko’alia ho komunidade,” Prezidente Autoridade Munisipál Baukau hateten iha Salaun Aprumentu Munisipál Vila Nova, Baukau, Kinta ne’e.
Eis deputada ne’e relata polémika referida hamosu ona grupu iha komunidade nia leet no grupu sira-ne’e hadau lejitimidade tanba laiha komunikasaun liuliu konsulta públika antes deside ba hamutuk ho Postu Administrativu Kelikai Antigu.
Veneranda Lemos husu komunidade Uaitame atu koopera ligadu ho baze legál sira-ne’ebé Governu aprova ona tanba bainhira kontinua ho polémika referida sei impata dezenvolvimentu hanesan atividade Programa Nasionál Dezenvolvimentu Suku (PNDS) no projetu Programa Dezenvolvimentu Integradu Munisipál (PDIM).
“Suku Uaitame tinan-ne’e laiha PNDS no PDIM tanba kontinua mosu polémika,” Veneranda akresenta.
Veneranda nafatin fó konfiansa ba intelektuál Uaitame-oan atu hamutuk solusiona polémika ne’e nune’e fasilita komunidade liuliu joven sira-ne’ebé kontinua hala’o estudu no inan aman sira-ne’ebé asesu ba subsídiu tanba presiza dokumentu legál husi suku.
Kazu polémika iha Suku Uaitame akontese bainhira grupu husi komunidade balun hakarak kontinua mantein ho razaun distánsia ne’ebé besik liubá Postu Administrativu Kelikai bainhira kompara ho atuál intregra bá Postu Kelikai Antigu.
Suku Uaitame rasik oras ne’e amuladu iha Postu Administrativu Kelikai Antigu ne’ebé estabelese liuhosi alterasaun dalatoluk Dekretu-Lei Nú. 11/2019, loron 07 Outubru, kona-ba Divizaun Administrativa Territóriu ne’ebé fahe Kelikai ba postu tolu hanesan Matebian, Kelikai no Kelikai Antigu.
Nune’e, Postu Administrativu Kelikai Antigu hamutuk suku lima kompostu Afasá, Namanei, Uaitame, Gurusá no Abafala ho totál populasaun hamutuk 11.227 husi totál uma-kain 2.684.
Entretantu, Suku Uaitame iha aldeia haat kompostu husi Aldeia Karanu, Gamana, Gugulai no Sialimo ho totál populasaun hamutuk 503 husi uma-kain 125.
Jornalista: Natalino Belo
Editór: Xisto Freitas da Piedade
