CNE fasilita edukasaun sívika ba alunu sira iha Kovalima
KOVALIMA, 12 Marsu 2026 – (TATOLI)- Komisaun Nasionál ba Eleisaun (CNE-sigla-portugés) fasilita edukasaun sívika kona-bá prosesu eleisaun ba alunu nível ensinu Sekundáriu Katólika Ave Maria Suai.
CNE hanesan órgaun Administrasaun Eleitorál independente ne’ebé fasilita Edukasaun sívika hodi konsolida demokrasia integridade eleisaun ba alunu sira iha ensinu Sekundáriu Katólika Ave Maria (ESCAM) Suai hodi prepara ba eleisaun kámara munisipál
“Ita-boot sira hatene ona edukasaun sívika ne’e ko’alia kona-bá sidadaun iha ligasaun ho Estadu. Edukasaun sívika ita ko’alia kona-bá oinsá ita-nia moris liga ba étika morál direitu no responsablidade iha sosiedade,” Responsavel CNE Ainaro no Kovalima, Elvino Bonaparte do Rego, ko’alia iha abertura atividade edukasaun sívika iha eskola ESCAM.
Nia dehan, ema hotu hatene nia direitu atu ko’alia, maibé iha responsabilidade, uza direitu bainhira iha tempu kampaña labele hakilar, bainhira direitu sa’e motorizada uza kanu-resin ne’e prezudika ema seluk atu deskansa, bele hala’o direitu maibé labele soke malu ho ema seluk nia direitu.
Edukasaun sívika ne’e ko’alia kona-bá prosesu eleisaun no atu hetan kartaun eleitorál.
Reprezentante Administradór Postu Administrativu Suai, Luzinho do Rego, dehan, edukasaun sívika ne’e importante, liga ba eleisaun ba partidu politiku, Eleisaun ba Prezidente Repúblika, eleisaun lideransa komunitária dadaun ne’e halo hela preparasaun eleisaun ba podér lokál.
“CNE hanesan Órgaun independente, atividade edukasaun sívika ba eskola sira ne’e hanesan programa programa regulár, tanba ne’e ita-boot tuir eleisaun faze ba dahuluk molok tuir eleisaun, ita-boot sira iha ona koñesimentu tanba daudaun ne’e iha hela preparasaun ba eleisaun podér lokál,” nia dehan.
Atu hala’o eleisaun podér lokál, Primeiru Ministru Kay Rala Xanana Gusmão hala’o diálogu oinsá Kovalima nia preparasaun hodi hele abansa realiza eleisaun podér lokál.
CNE hanesan órgaun fiskalizadora, STAE hanesan órgaun implementadór nune’e fasilitan Edukasaun Sívika iha eskola sira.
Vise Diretór Eskola ESCAM, Martinhos Claran, agradese tanba bele hetan vizita husi CNE hodi partila informasaun kona-bá prosesu eleisaun
“ohin loron importante tebes ba ita-boot sira atu rona informasaun husi CNE kona-bá prosesu eleisaun tanba bainhira ita-boot sira la komprende, bele husu nune’e bele kontinua partilla informasaun ba kolega sira seluk,” nia fó hanoin.
Jornalista: Celestina Teles
Editór: Evaristo Soares Martins
