VIKEKE, 12 Marsu 2026 (TATOLI)—Organizasaun Naun Governamentál (ONG) Fundasaun Kunua Haberan Komunidade (F-KHK) husi Munisípiu Vikeke apoiu fundu hamutuk $500.00 ba Grupu Tuda Asu, Aldeia Lua, Suku Uma-Ki’ik, Postu Vikeke Vila hodi hadi’a komunidade nia ekonomia.
Iha distribuisaun fundu ne’e, Diretór Ezekutivu F-KHK, Augusto Pinto haktuir, kona-ba fundu ne’ebé F-KHK apoia ba Grupu Tuda Asu ne’e maihusi parseiru Caritas Austrália hodi tulun grupu sira atu haforsa sira-nia fundu.
“Apoia fundu ne’ebé ami oferese ba ita-nia Grupu Tuda Asu inklui branka osan nian, atu grupu bele rai sira-nia osan iha branka laran. Husi fundu ne’e, ami ajuda grupa para haforsa sira-nia ekonomia hodibele halo negósiu no mós fó impresta tutan ba ema,” Augusto Pinto ba TATOLI iha Postu Vikeke Vila, Kinta ne’e.
Augusto subliña bainhira membru grupu sira-nia ekonomia di’ak bele mós redús violénsia iha sira-nia família laran, tanba ne’e F-KHK apoiu fundu ba sira atu hadi’a ekonomia família nian.
“Ha’u sente fundu la’ós boot liu, maibé husi orsamentu ki’ik-ne’e grupu sira jere ho di’ak, bele ajuda ona ita-nia grupu sira hodi hadi’a sira-nia ekonónia,” nia relata.
Nune’e, nia husu membru Grupu Tuda Asu atu halo jestaun ba fundu ne’ebé parte F-KHK ho parseiru Caritas oferese no servisu ho transferénsia entre membru grupu sira hodi garante sustentabilidade ba iha futuru.
Antes ne’e, ekipa F-KHK oferese formasaun sira hanesan DRR, Maskulinidade, domin, respeitu, realsaun, harohan no formasaun kona-ba depozita no fó impresta osan. Entretantu, Grupu Tuda Asu Aldeia Lua ho totál membru hamutuk na’in-25 kompostu husi mane na’in-11 no feto na’in-(14).
Iha parte seluk, Koordenadór Grupu Tuda Asu, Ovídio Amaral, esplika Grupu Tuda Asu harii iha tinan 2024 ho objetivu atu hafásil roda ekonomia família ne’ebé liuhusi rai no impresta osan hodi hamenus dezempregu iha aldeia.
Inísiu harii grupu ne’e, nia haktuir, ho kapitál hamutuk 1.000,05 no foin lalais F-KHK apoia tan fundu kiik hamutuk $500 nune’e totál fundu atuál $1.500,05.
“Grupu ne’e ami komunidade Aldeia Lua harii hodi ami fó impresta ba membru sira halo negósiu loke kioske. Imprestadu hamutuk ema na’in-tolu (3) mak loke kioske ki’ik ona no membru balun selu oan sira-nia bá eskola hamutuk na’in-15. Nune’e, benefísiu husi grupu ne’e fasilita membru sira impresta osan, maski fundu ki’ik, maibé bele ajuda sira,” nia subliña.
Partisipa iha distribuisaun fundu ba grupu Tuda Asu ne’e husi autoridade lokál, funsionáriu F-KHK no membru Grupu Tuda Asu.
Jornalista: Vitorino Lopes da Costa
Editór: Xisto Freitas da Piedade
