DILI, 13 Marsu 2026 (TATOLI)—Embaixadór Singapura ba Timor-Leste, Robin Hu, konsidera espíritu nasaun Timor-Leste no nia povu sei lori nasaun ne’e ba futuru ne’ebé naroman.
Nia hatio’o kestaun ne’e hafoin hala’o despedida ho Primeiru-Ministru, Kay Rala Xanana Gusmão, ba terminasaun ninia mandatu durante tinan tolu (3) iha Timor-Leste.
“Ha’u halo relasaun ho ema barak ne’ebé nia konsege koñese no nia reafirma espíritu povu nian ne’ebé nia admira tebe-tebes. Nia iha konfiansa katak espíritu nasaun Timor-Leste no nia povu sei lori nasaun ne’e ba futuru ne’ebé naroman ba ema hotu,” Embaixadór informa ba jornalista sira iha Palásiu Governu, ohin.
Iha tempu ne’ebá, nia aprende barak husi lideransa Timor-Leste nian liuliu husi Primeiru- Ministru no Prezidente da Repúblika, inklui lideransa sira seluk hanesan iha Governu, igreja, organizasaun naun governamentál no ajénsia multilaterál sira.
Tamba ne’e, Singapura hamutuk ho membru nasaun sira seluk iha ASEAN, hetan tan membru foun ida mak Timor-Leste ne’ebé sai membru ASEAN ba da-11.
“Nune’e Singapura implementa programa oinoin hodi apoiu kapasidade tékniku ba Timor-Leste atu sira bele partisipá iha reuniaun ASEAN nian, tanba oportunidade ekonomia no sosiál ne’ebé sei mai iha futuru oin mai,” nia hateten.
Aleinde ne’e, nia informa, durante nia mandatu tinan tolu iha Timor-Leste, nia admira liu ema Timor-Leste nia kualidade no espíritu, iha istória barak ba sira-nia prosesu independénsia nasionál, maibé nia haree katak Timor-Leste nia povu iha karaterístika forte, tolerante no otimista ba futuru.
Jornalista : Alexandra da Costa
Editór : Cancio Ximenes
