DILI, 13 Marsu 2026 (TATOLI)-Parlamentu Nasionál promove konkursu eskrita kona-ba “Correio CPLP” iha lia-portugés ba foinsa’e timoroan sira hodi komemora Loron Mundiál Língua Portugeza no Kultura iha Komunidade País Ko’alia Lian Portugés (CPLP) iha 05 Maiu.
Konkursu ne’e fó sai ona iha loron 11 Marsu, durante períodu loron 12, ba foinsa’e timoroan ho idade 12 to’o 17, ne’ebé hela iha territóriu nasionál atu kompete.
Tuir karta publikasaun ba konkursu referida ne’ebé Tatoli asesu husi Parlamentu, atividade ne’e ho objetivu atu insentiva kriatividade no espresaun hakerek, promove simultaneamente valorizasaun língua portugeza no diálogu entre joven iha espasu CPLP.
Ho nia regra ba partisipasaun individuál no kada konkorrente bele hakerek iha karta rasik ho liman iha suratahan obrigatóriu ho lia-portugés ho liafuan entre 80 no 160 no labele utiliza ferramenta hanesan Intelijénsia Artifisiál (IA)
Obrigatóriu utiliza formatu iha karta ho ninia estrutura formál, fatin, data, saudasaun, korpudetestu, despedida no asinatura.
Karta inklui ilustrasaun autoria kandidatu, no ba destináriu sira eskalaun I ba kandidatu ho idade 12 to’o 14, eskalaun II ba idade 15 to’o 17.
Júri konkursu sei avalia kritéria husi estrutura no aprezentasaun, adekuasaun ho objetivu no tema konkursu, kriatividade no orjinalidade, espresividade no domíniu lia-portugés.
“Ba vensedór prémiu primeiru lugar sei hetan $150, segundu lugar $125, terseiru $100 ho livru língua portugeza”, dokumentu ne’e fó sai.
Lembra katak Parlamentu Nasionál dezde uluk halo ona atividade oioin hodi komemora loron importante ne’e hodi promove língua portugés no kultura CPLP.
Jornalista: Nelson de Sousa
Editora: Maria Auxiliadora
