PR Ramos-Horta realiza enkontru bilaterál ho lider UNCTAD
DILI, 13 Marsu 2026 (TATOLI)—Durante iha Fórum Global Baku XIII, Prezidente Repúblika, José Ramos-Horta, hala’o enkontru bilaterál estratéjiku ida ho Sekretária-Jerál Konferénsia Nasaun Unida ba Komérsiu no Dezenvolvimentu (UNCTAD, sigla inglés), Rebeca Grynspan.
“Enkontru nivel aas ne’e fó oportunidade krusiál ida atu fahe perspetiva sira kona-ba panorama internasionál atuál, foka maka’as ba dezafiu urjente sira-ne’ebé sistema multilaterál hasoru no papél vitál Nasaun Unida nian iha promosaun ba pás globál, kooperasaun internasionál no dezenvolvimentu sustentavel,” refere nota imprensa ne’ebé Agência Tatoli asesu, ohin.
Foku sentrál husi diálogu ne’e foka ba dinámika sira-ne’ebé dezenvolve daudaun iha sistema Nasaun Unida nia laran, liuliu prosesu selesaun ne’ebé besik ona ba Sekretáriu Jerál ONU tuir mai.
Prezidente Ramos-Horta no Sekretária-Jerál Grynspan fahe reflesaun kle’an sira kona-ba nesesidade krítika ba lideransa internasionál ne’ebé forte no vizionária, ne’ebé kapaas atu revitaliza multilateralizmu no responde ho efetivu ba krize globál ohin loron nian ne’ebé kompleksu no interligadu.
Enkontru iha Baku ne’e fó kontinuidade ho perfeisaun ba diálogu produtivu ne’ebé hahú entre líder rua ne’e iha tinan ne’e nia laran, iha Fórum Ekonómiku Mundiál iha Davos iha loron 21 Janeiru 2026.
Liuhusi kontinua fahe ideia importante ne’e, Prezidente Ramos-Horta reafirma Timor-Leste nia kompromisu ativu atu forma konversa sira kona-ba governasaun globál no asegura katak instituisaun multilaterál sira nafatin forte, inkluzivu no kapaas atu dirije iha arena internasionál modernu.
TATOLI
