DILI, 13 Marsu 2026 (TATOLI)–Governu liuhusi Sekretária Estadu Formasaun Profisionál no Empregu (SEFOPE) aprezenta no aprezenta livru manuál komunikasaun lian Japaun ho versaun Tetun–Japaun hodi tulun joven Timor-Leste sira-ne’ebé hakarak ba servisu iha Japaun.
Konsellu SEFOPE, Ilidio Ximenes da Costa, hateten livru ho nia titulu “Matadalan Komunikasaun Lian Japones” ne’e sei sai hanesan manuál ba jerasaun foun sira-ne’ebé hakarak estuda lian Japaun antes tama iha programa servisu iha rai-li’ur nian.
Livru ne’e hakerek husi autór na’in-rua husi Japaun, Naoko Takaku no Yuiko Matsumura, no hetan mós apoiu husi indívidu no empreza sira iha Japaun. Nune’e nia kongratula ba autór na’in-rua ne’e rasik tanba husi sira-nia esforsu hodi hakerek livru ne’e husi inísiu enkontru iha Embaixada Timor-Leste iha Tokyo to’o iha lansamentu.
“Livru ne’e sei sai hanesan manuál no referénsia ba jerasaun foun sira-ne’ebé hakarak estudu lian Japaun hodi tuir programa Technical Intern Training,” Ilidio Ximenes da Costa hateten ba Agência TATOLI liuhusi WhatsApp, ohin.
Programa Technical Intern Training Program (TIT) loke oportunidade ba sidadaun Timor-Leste sira hodi servisu no hetan esperiensia servisu iha Japaun.
Nia hatutan, tanba ne’e Governu liuhusi SEFOPE liuliu-liu kargu dirijente sira presiza fornese orsamentu hodi imprensa livru ida-ne’e halo barak liután hodi distribui ba sentru formasaun sira ne’ebé hanorin lian Japaun.
“Aleinde ne’e SEFOPE mós presiza hamutuk ho Japan International Cooperation Agency (JICA) hodi apoiu dezenvolvimentu estudu lian Japaun ba kandidatu traballadór migrante sira,” nia dehan.
Tamba nia fiar katak livru sira-ne’e sei tulun jerasaun foun Timor-Leste sira hodi hasa’e sira-nia abilidade lian Japaun no prepara sira-nia an didi’ak molok ba servisu iha Japaun.
Entretantu atividade lansamentu livru ne’e realiza iha Tokyo Japaun, ne’ebé hetan partisipasaun husi Diretór Jenerál Formasaun Profisional no Servisu, Carlito Cabral, no Diretór Nasionál Servisu Liurai, Joao Correia iha Embaixada TL iha Japaun.
Jornalista : Alexandra da Costa
Editór : Cancio Ximenes
