DILI, 13 Marsu 2026 (TATOLI) – Sidadaun sira dadeer ne’e halibur malu iha edifísiu Banku Sentrál Timor-Leste (BCTL, sigla portugés) hodi ezije banku troka osan sentavu 200 ba fali moeda sira seluk hanesan sentavu 25, 50 no 100.
Sidadaun sira ne’e forma husi tuku 08h00 dadersán hodi husu banku atu troka sentavu 200 ba moeda seluk tanba rona informasaun katak osan ne’e loja no kioske sira la simu bainhira halo tranzasaun. Kestaun ne’e akontese tanba BCTL fó sai katak iha ona sirkulasaun moeda falsa sentavu 200 iha merkadu nasionál.
Sidadaun sira maioria lori osan ne’ebé sira tau iha konfre, balun lori osan koin sentavu 200 ne’ebé sura husi $150, $1.200 to’o $1.500.
Tanba haree ba ajuntamentu ema iha edifísu maka BCTL foti desizaun hodi esplika ba populasaun oinsá halo diferensa entre moeda falsa no orijinál molok troka osan sentavu 200 ba moeda seluk.
Nune’e, iha tuku 09h00 dadersán, BCTL simu osan sentavu 200 hodi troka ba moeda seluk.
Iha entrevista ho Tatoli, populasaun sira fó razaun katak sira lori moeda sentavu 200 ne’e bá banku tanba osan ne’e lori bá loja atu sosa sasán mós la simu.
“Moeda ne’ebé ami iha maski orijinál hotu, maibé ita lori bá merkadu, loja atu sosa sasán ema la simu, nune’e ami lori mai banku atu troka fali ba moeda sira seluk nune’e ami uza”, Servino Amaral dehan ba Tatoli, ohin.
Servino lori moeda sentavu 200 hamutuk 150-resin no konsege troka fali ba moeda sira seluk hanesan 100c, 50c no 25c. “Importante mak osan moeda 200 ne’e bele troka, nune’e ha’u bele lori fali halo negósiu. Osan ne’ebé ha’u lori mai troka ne’e, ha’u tau iha kofre, rezultadu husi ha’u fa’an sigarru no pulsa”, dehan.
Fatima de Jesus husi munisípiu Aileu lori moeda 200 sentavu ne’ebé sura hamutuk $1.200 hodi troka iha BCTL. “Osan sira ne’e ha’u lori mai tanba ami rona dehan sentavu 200 ne’e falsu hotu, nune’e lori mai troka. Ohin, ha’u troka iha laran Banku simu ho di’ak tanba osan ha’u lori mai ne’e la falsu”, nia relata.
Nia parte husu ba Governu atu rezolve lalais situasaun ne’e, atu moeda sentavu 200 ne’e bele iha valór fali.
Notísia relevante: Loja no kioske balun iha Dili komesa la simu tranzasaun ho moeda sentavu 200
Jornalista: Arminda Fonseca
Editora: Maria Auxiliadora
