Timor-Leste partisipa iha diskusaun polítika ekonomia ASEAN iha Prep-SEOM ba AEM Retreat
DILI, 13 Marsu 2026 (TATOLI) – Timor-Leste partisipa iha diskusaun Preparatory Senior Economic Officials Meeting (Prep-SEOM) ba ASEAN Economic Ministers (AEM) Retreat da-32, ne’ebé realiza iha Bonifacio Global City, iha Manila, Filipina, entre loron 11 no 12 Marsu.
Iha reuniaun ida-ne’e, Vise-Ministru Komérsiu no Indústria, Augusto Júnior Trindade, reprezenta Timor-Leste nu’udar SEOM Lead, hodi partisipa iha prosesu koordenasaun polítika ekonomia rejionál Asosiasaun Nasaun Sudeste Aziátiku (ASEAN) nian no kontribui ba diskusaun kona-ba prioridade ekonomia rejiaun Sudeste Aziátiku.
Reuniaun ne’e partisipa mós husi Senior Economic Official husi nasaun membru ASEAN no ofisiál husi Sekretariadu ASEAN. Diskusaun sira foka ba prioridade prinsipál ekonomia rejional tuir orientasaun ASEAN Economic Community Blueprint, inklui esforsu hodi haforsa integrasaun ekonomia no koopersaun komérsiu entre nasaun membru sira.
Prep-SEOM ne’e mós sai nu’udar etapa preparasaun ba AEM Retreat ba da-32, ne’ebé realiza iha loron 13 Marsu 2026, ne’ebé Ministru Ekonomia ASEAN sira sei diskute no aprova rekomendasaun sira husi Senior Economic Officials.
Durante reuniaun, partisipante sira troka hanoin kona-ba dezenvolvimentu ekonomia rejional iha kontestu mudansa jeoekonomia globál, inklui padraun komérsiu internasionál, impaktu dijitalizasaun ba ekonomia rejionál no influénsia situasaun jeopolítika mundiál. Diskusaun sira ne’e halo tuir prioridade ekonomia ne’ebé define husi Filipina nu’udar Prezidénsia ASEAN ba tinan 2026.
Reuniaun ne’e mós reviza progresu implementasaun desizaun sira iha 47th ASEAN Summit, inklui medida sira hodi fasilita integrasaun graduál Timor-Leste iha estrutura no arrajamentu ekonomia ASEAN nian. “Diskusaun sira ne’e hatudu kompromisu kontínua husi ASEAN hodi apoia partisipasaun Timor-Leste iha kooperasaun ekonomia rejionál”, sita husi dokumentu ne’ebé Tatoli asesu, ohin.
Senior Economic Officials sira mós haree filafali progresu negosiasaun kona-ba ASEAN Digital Economy Framework Agreement (DEFA), inisiativa rejional importante ida atu promove dezenvolvimentu ekonomia dijitál, haforsa konetividade dijitál no fasilita fluxu dadus transfronteira, no motiva kreximentu ekonomia ne’ebé bazeia ba inovasaun iha rejiaun.
Iha diskusaun sira ne’e, Timor-Leste enfatiza importánsia abordagem inkluziva iha kooperasaun ekonomia ASEAN, ne’ebé konsidera diferensa estrutura ekonomia no nivel dezenvolvimentu entre nasaun membru sira, hodi asegura katak kooperasaun rejionál bele responde ba nesesidade nasaun sira ne’ebé sei dezenvolve.
“Timor-Leste reafirma nia kompromisu hodi kontinua partisipa ativamente iha prosesu kooperasaun ekonomia ASEAN ho preparasaun doméstika hodi partisipa kompletamente iha estrutura no akordu ekonomia ASEAN nian, hodi kontribui ba komunidade ekonomia ASEAN ida ne’ebé reziliente, inkluziva no orientada ba futuru”, dehan nota ne’e.
TATOLI
