VIKEKE, 14 Marsu 2026 (TATOLI) – Koodernadór Infraestutura Ministériu Obras Públika (MOP) Munisípiu Vikeke, Mario Angelo Menezes, relata, obra konstrusaun fízika estrada husi postu Uatulari, Munisípiu Vikeke liga bá Laisorulai, munisípiu Baukau hamutuk kilómetru 22, daudauk ne’e atinji 20.24%.
“Kona-ba progresu konstrusaun fíziku estrada husi postu Uatulari ne’ebé liga bá Laisorulai ita-nia empreza sira atinji ona pursentu 20.24%. Nune’e, daudauk ne’e ita-nia empreza internasionál kontinua hala’o hela serbisu,” Mario Angelo Menezes ba TATOLI, iha postu Vikeke Vila, ohin.
La’o tuir kondisaun klíma
Kordenadór ne’e hatutan, atinjimentu ne’ebé empreza internasionál internasional husi Xina Shanghai Konstrusaun daudauk ne’e konstrui hela mak hanesan morru protesaun (saluran, tembok penahang), gabiaun (bronjong) no cutting (ko’a estrada) ninin sira.
“Progresu ne’ebé empreza atinji ne’e la’o tuir kondisaun klíma udan ne’ebé ita iha, sempre difikulta ba ita-nia empreza sira-nia serbisu tanba kuandu udan sira labele halo servisu. entaun hein udan hafoin kontinua fali servisu. Tan ne’e mak progresu ne’e ita haree sei ki’ik”, nia relata.
Nia aprofunda, bazeia ba kontratu ne’e tinan rua, maibé fila fali ba kondisaun klíma udan, entaun difikulta empreza hodi konklui obra estrada Uatulari liga bá Laisorulai.
“Klíma udan parte munisípiu Vikeke ne’e bailoron iha de’it fulan rua ka tolu hanesan fulan-Agustu, Setembru no Outubru. Enkuantu, fulan sira seluk ne’e ita udan entaun ita-nia empreza servisu hadau malu udan-been ida-ne’e mak sai dezafiu hodi konklui obra tuir kontratu ne’ebé entre governu no empreza,” nia akresenta.
Kona-ba obra ne’e, nia dehan, daudauk ne’e MOP destaka enjiñeru sira hodi akompaña hela servisu hodi grante ba kualidade tanba kontrusaun estrada ne’e konklui sei fasilita komunidade sira-nia viajen.
Konstrusaun estrada husi Uatulari bá Laisorulai, iha suku Matahoi, postu Uatulari mak kona uma hitu nune’e ekipa nasionál daudauk ne’e rekolla ona dadus.
“Husi rezultadu uma ne’ebé afeta ba estrada purvolta uma hitu resin. Maibé, ha’u seidauk halo konfirmasaun ba parte verifikasan uma nian. Ita ekipa sira rekolla ona dadus,” nia relata.
Entretantu, Projetu konstrusaun estrada husi Uatulari too Laisorulai hamutuk kilometru 22, ho orsamentu hamutuk $18,462,610.14. Projetu referidu ho durasaun kontratu hahú loron 18 Outubru 2024 no sei ramata iha loron 03 Abríl 2026.
Jornalista : Vitorino Lopes da Costa
Editór : Rafael Ximenes de A. Belo
