DILI, 15 Marsu 2026 (TATOLI) –Estudante timoroan iha Izraél, Egas da Silva, klarifika kona-ba informasaun ne’ebé fó sai iha mídia sosiál deklara katak Guarda Revolusionáriu Iraun oho Primeiru-Ministru Izraél, Benjamin Netanyahu, ne’e “Hoax”, tanba situasaun iha ne’ebá kontroladu no seidauk iha informasaun kona-ba Xefe Governu Izraelense nia mate.
“Mídia ida iha ne’e la fó sai informasaun no PM Izraél la mate ida. Ami seguru hela maske funu ne’e durante semana rua ona, toba mós ladi’ak tanba loron kalan ema tiru malu hela de’it, ne’ebé ami hela loos iha rai-okos de’it ka setel abrigu ba subar-fatin,” Egas da Silva relata ba Agência TATOLI iha telefone, ohin.
Kondisaun baibain hela
Estudante timoroan ne’e reforsa, bainhira informasaun dehan PM Izraél mak mate ne’e normalmente situasaun iha Izraél labele kontroladu (Gacor) servisu hotu sei la la’o, ne’ebé informasaun dehan PM Izraél mate ne’e bosok de’it tanba sira mós seidauk rona informasaun.
Tanba tuir estudante ne’e nia observasaun, Izraél nia seguransa ne’e kontroladu no seguru tebes maske lansamentu bomba iha ár ne’e akontese duni no kuaze bomba barak mak blokeia iha aéreu.
“Ami hela hotu iha Tel Aviv, ne’ebé kondisaun baibain hela, kuaze uma rua mak foin rahun – ida akontese iha semana kotuk, uma ida akontese horiseik. Maibé, ami halo servisu hanesan baibain iha tempu loron,” nia hateten.
Entretantu, daudaun ne’e totál estudante timoroan ne’ebé hala’o estudu no hela iha Izraél hamutuk 84, kompostu husi feto na’in-24 no mane na’in-60.
Jornalista: Alexandra da Costa
Editór: Rafael Ximenes Belo
