LAUTEIN, 15 Marsu 2026 (TATOLI) –Primeiru-Ministru (PM), Xanana Gusmão, domingu ne’e, hala’o enserramentu ba tasa rotativa Avo Nana ba époka II 2025 iha munisípiu Lautein 2025.
Jogu ba Tasa Rotativa Avo Nana II ne’e rasik hala’o iha 2025 ne’ebé partisipa husi klubu 43 kompostu husi modalidade voleiból, futeból no futsal (Futeból salaun).
Nune’e klubu ne’ebé iha tama iha finalidade no sai kampiaun ka manán-na’in sira iha Kopa Avo Nana 2025 ne’e kompostu hosi modalidade futsal feto primeiru lugar hosi Savarika FC, segundu lugar Sporting FC, terseira lugar Fitun Loro-sa’e FC, no kuartu lugar Belta Três FC.
Modalidade volly-bola feto primeiru lugar Fitun Loro-sa’e, segundu lugar Nakroman, Terseiru lugar Edukasaun, enkuantu mane primeiru lugar Ocho Cao, segundu lugar Portu Com no terseiru lugar Makalero.
Modalidade Futebola mane, primeiru lugar Lereloho, segundu lugar Solamor “Ba” no terseiru lugar Buradu no kuatru lugar Boca Junior.
Husi modalidade sira ne’e prémiu ba manán-na’in sira ne’e ho valór lahanesan, kompostu hosi osan bá manán-na’in volley bola primeiru lugar $400, segundu lugar $300 no terseiru lugar $200. Futsal feto primeiru lugar $500, segundu lugar $400, terseiru lugar $300 no kuatru $200. Enkuantu osan bá manán-na’in modalidade futebol primeiru lugar $1.200, segundu lugar $800 no terseiru lugar $500.
Hafoin jogu Komisaun organizadora mós entrega prémiu ba mellor markadór, mellor jogadór, no mellor guarda ho osan $100.
Desportu kria amizade
PM Xanana hato’o parabéns ba komisaun organizadora tanba organiza ona atividade ne’ebé promove atividade desportivu iha komunidade nia leet, ida-ne’e halibur di’ak tebes tanba desportu kria amizade, fraternidade.
“Husi desportu ita koñese malu. Iha desportu ita harii karater di’ak ba timor-oan sira. Lakon ka manán la’ós problema boot, ohin lakon aban manán,” Xanana Gusmão hateten iha Kampu Multifunsaun Munisipál Lautein.
Nia mós dehan, ba oin tenke hadi’a kampu futebol Lautein tanba bainhira nia akompaña iha jogu haree jogadór barak mak monu hanoin tanba ain moras, ka falta ezersísiu maibé razaun seluk haree kondisaun kampu mós aat lo’os, ne’ebé hotu tenke hanoin atu hadi’a. Ne’ebé, tenke hadi’ak uluk kampu ne’e.
PM Xanana rekoñese katak atividade desportiva ne’e hala’o hasoru difikuldade oioin maibé fiar katak komisaun kopa Avo Nana sei lori desportu ba to’o iha komunidade nia leet, hodi halibur joven sira, hadi’a sira-nia karatér, hametin domin no dame, ida-ne’e maka hothotu persiza iha rai ne’e.
Prezidente Komisaun Orgazadora ba Taxa Rotativa Avo Nana II 2025, Toborsio dos Santos, hateten, jogu ne’e rasik realiza iha Outubru 2025, maibé foin finaliza iha tinan ne’e tanba hasoru difikuldade oioin.
“Ita-nia klube ne’ebé partisipa ne’e barak loos nune’e ita halo fali finalidade ne’e mai fali iha tinan-ne’e, agradese tebes tanba tinan bele finaliza, no espera jogu kontinua nafatin hodi kria amizade entre joven sira,” nia konklui.
Partisipante iha atividade ne’e maka Tenente jenerál reformadu, Lere Anan Timur, Major Jenerál Aluc Deskartes, Maunana, membru Governu, membru Parlamentu Nasionál no intelektuál Lautein-oan sira.
Jornalista: Arminda Fonseca
Editór: Rafael Ximenes de A. Belo
