LAUTEIN, 16 Marsu 2026 (TATOLI)-Autoridade lokál sira iha munisípiu Lautein preokupa ho liña internét ne’ebé atu apoia sira-nia serbisu iha baze.
Xefe suku Bauro, postu administrativu Lospalos, Florindo Miranda, hateten iha munisípiu Lautein, liuliu área remota sira ne’e to’o agora seidauk asesu ba liña internét. Tanba ne’e, nia husu ba Governu oinsá atu tau atensaun.
“Hakarak husu ba Ministériu Transporte no Komunikasaun atu haree ba liña internét iha ami-nia munisípiu tanba iha área remota ami asesu liña internét susar la halimar, iha serbisu liga ho dadus dijitalizasaun”,xefe suku ne’e hato’o.
Iha sorin seluk, Xefe Suku Ailebere, postu administrativu Iliomar, munisípiu Lautein, Libernito Gomes, hateten daudaun Governu dijitaliza serbisu hothotu, maibé iha área rurál sira hasoru difikuldade ba liña internét atu tulun serbisu.
Nia dehan Timor-Leste iha ona fibra óptika no hanoin Governu tenke aselera lalais iha utilizasaun ninian, nune’e bele apoia povu iha área rurál.
Hatán ba kestaun ne’e, Ministru Transporte no Komunikasaun (MTK), Miguel Marques Manetelu, hateten kona-ba liña internét la’ós de’it iha suku Bauro ka munisípiu Lautein, maibé kuaze área remota sira iha situasaun ne’ebé hanesan.
Ho problema ida internét ida-ne’e maka Governu deside halo investimentu ba kabu submariñu no projetu ne’e agora halo hela teste. “Internét sira ne’ebé uza ba serbisu públiku, tantu nasionál to’o iha munisípiu ne’e mai husi kabu submarinu fibra ótika nian. Agora iha faze teste hela. Espera katak antes fulan ida-ne’e remata ou tarde liu primeira semana fulan-Abríl tinan ne’e ita bele lansa ba Ready for Service”, nia informa.
Governante ne’e esplika kona-ba utilizasaun liña internét iha buat rua mak ba servisu públiku ne’e fornese husi Ministériu Transporte no Komunikasaun, maibé ba populasaun fornese husi operadór telekomunikasaun ho Internet Service Provider (ISP), enkuantu Governu la tama ba merkadu, tanba iha 2012 liberaliza ona setór telekomunikasaun.
“Kuandu internét ne’ebé liga ba servisu públiku iha ministériu sira, hanesan iha edifísiu sira iha munisípiu, ne’e liuhusi ministériu, maibé ba oin iha ita-nia empreza estatál Cabos de Timor-Leste maka sei jere internét ne’ebé mai husi fibra ótika ne’e. Ministériu liuhusi nia diresaun nasionál DNIK sai hanesan ISP ida ba servisu públiku ka ajénsia Governu nian”, salienta.
Nai esplika katak ba suku sira iha área remota la konsege liga fibra ótika iha 2026, maibé ministériu aloka ona osan no sei instala Starlink iha sede suku sira hotu iha territóriu.
“Ba populasaun no joven sira ne’ebé uza telefone adroid no internét lentu karik ami sei ko’alia ho operadór sira, oinsá bele hadi’a ka mellora servisu internét ba ita-nia populasaun sira”, Miguel promete.
Nia parte mós esplika koba-ba projetu nasionál ida naran Projetu Konetividade Nasionál (NCP) ne’ebé iha Maiu tinan ne’e konklui no postu administrativu sira hotu iha territóriu nasionál sei konekta hotu ho kabu fibra ótika nian.
Notísia relevante: MTK no CTL,E.P lansa tan “try out” koneksaun Fibra Ótika ba operadór telekomunikasaun
Jornalista: Arminda Fonseca
Editora: Maria Auxiliadora
