DILI, 16 Marsu 2026 (TATOLI)–Embaxiadór naun-rezidensia husi nasaun Kroasia mai Timor-Leste Neojsa Koharovic, segunda ne’e, hasoru malu ho Prezidente Repúblika José Ramos-Horta iha Palásiu Prezidensiál Bairru-Pite Dili hodi diskute kona-ba kooperasaun bilaterál atu dezenvolve ekonomia no turizmu.
“Ohin, ha’u hasoru malu ho Prezidente Ramos-Horta ko’alia liu kona-ba kooperasaun bilaterál nasaun rua (2) nian. Buat ne’ebé ami ko’alia atu nasaun rua dezenvolve hamutuk mak ekonómia no turizmu,” Embaixadór ne’e hateten ba jornalista sira hafoin ramata enkontru ho Xefe Estadu.
Nia dehan, Kroasia hakarak tebes atu loke dalan ba kooperasaun ida-ne’ebé fó benefisiu hamutuk.
“Ami loke dalan tebes ba Timor-Leste atu halo kooperasaun ida ne’ebé atu fó benefisiu hamutuk. Ita presiza ba futuru halo kooperasaun iha área ekonomia no turizmu, ami bele apoiu ita-boot sira, maske embaixada iha Jakarta maibé ami-nia konsuladu ida iha hela Timor-Leste hodi haree asuntu sira ita ko’alia oinsa bele avansa ba kooperasaun iha tempu besik,” nia dehan.
Aleinde ne’e, nia dehan, diskute mós kona-ba kooperasaun entaun parte rua ko’alia mós kona-ba situasaun globál ne’ebé daudaun ne’e akontese liuliu funu entre Israel, Estadu Unidu Amérika (EUA) no Iraun.
Tuir Embaixadór ne’e dehan, bainhira konflitu iha Médiu Oriente kontinua nafatin mak sei fó impaktu boot ba ekonómia mundu nian.
Jornalista : Hortencio Sanchez
Editór : Cancio Ximenes
