VIKEKE, 16 Marsu 2026 (TATOLI)—Koordenadór Estensionista Postu Administrativu Uatulari, Munisípiu Vikeke, Francisco Tilman Belo informa distribuisaun fini-hare ba postu Uatulari menus ba agrikultór sira iha époka 2026.
“Kona-ba fini-hare ne’ebé Ministériu Agrikultura, Peska, Pekuária no Floresta (MAPPF) foin lalais ne’e distribui ona mai Postu Uatulari hamutuk tonelada sia (9). Husi fini-hare kuantidade ne’ebé distribuidu ami haree sei menus tebes,” Francisco ba TATOLI iha Postu Vikeke Vila, Segunda ne’e.
Koordenadór estensionista ne’e hatutan kuantidade fini-hare tonelada sia ho variedade hare-mutin no hare-mean ne’ebé daudaun ne’e iha kálkula ba natar sira iha Postu Uatulari hanesan iha irrigasaun Bebui hamutuk ektare 1.100, natar área Makadike totál ektare 692, enkuantu natar área Betór husi Suku Makadike no Suku Matahoi hamutuk ektare 592, natar Betu-Bou no Uelaku-Rubi hamutuk ektare 79, natar Osobere-Isi no Saeliri totál ektare 278.
Fini-hare husi tonelada sia distribui ba suku ualu no kada suku sei hetan fini-hare hanesan suku Afaloikai tonelada rua (2), enkuantu suku hitu seluk kada suku ida hetan tonelada ida.
Kona-ba fini-hare ne’ebé la sufisiente, Francisco informa, parte servisu agrikultura munisípiu fó ona resposta katak kuandu la to’o sei distribui tan bá Postu Uatulari.
Postu Administrativu Uatulari hamutuk suku ualu (8) ho totál populsaun hamutuk rihun 1.394 no totál uma-kain 12.622.
Jornalista: Natalino Belo
Editór: Xisto Freitas da Piedade
