VIKEKE, 16 Marsu 2026 (TATOLI)—Jestór abastesimentu Borala Munisípiu Vikeke, Florêncio Armindo da Costa, informa realisoná funu iha médiu oriente fó impaktu ba presu mina sira, tanba ne’e presu mina iha abastesimentu Borala Vikeke daudaun hahú sa’e iha semana kotuk iha-ne’ebé kada litru gazoel sa’e bá $1.50 no gazolina $1.25.
“Ida-ne’e kauza husi akontesimentu funu iha médiu oriente ne’ebá entre Iraun, Izraél no Amérika. Tan ne’e mak agora presu sa’e,” Florêncio ba TATOLI iha Postu Vikeke Vila, Segunda ne’e.
Jestór Borala ne’e hatutan presu kombustivel ne’e la’os empreza sira mak hakarak hasa’e, maibé bazeia ba presu husi pertamina sira iha Dili ne’ebá.
Notísia relevante: Retalista sira hasa’e folin kombustivel tuir presu husi empreza fonesedora
“Se ami ba sosa mak mina folin sa’e, ami mós fa’an tuir ida-ne’e. La’os ami hakarak hasa’e presu mina nian,” nia subliña.
Florêncio haktuir, antes ne’e, gazoel litru ida presu $1.16 no gazolina litru ida folin $1.15.
“Iha fulan kotuk ita-nia folin mina ne’e presu normál, maibé akontese funu iha ema nia rai folin mina sa’e hotu,” nia tenik.
Kona-ba estoke mina, nia dehan, daudaun ne’e estoke ne’ebé iha kada abastesimentu gazolina iha tonelada sanulu (10) no gazoel tonelada sanulu (10). Borala iha abastesimentu rua mak lokalizadu iha Munisípiu Vikeke. Ida iha área Beloi no ida seluk iha área Jardín 1959 Vikeke Vila.
Jornalista: Vitorino Lopes da Costa
Editór: Xisto Freitas da Piedade
