Prezidente kondekora Kolár Orden TL no Medalla Méritu ba diplomata Singapura na’in-rua
DILI, 16 Marsu 2026 (TATOLI) – Prezidente Repúblika José Ramos-Horta kondekora Medalla Kolár Orden Timor-Leste nian no medalla Méritu ba diplomata Sinagapura na’in-rua (2) nu’udar rekoñesimentu ba sira-nia servisu esepsionál no kontribuisaun signifikativa ba nasaun nia dezenvolvimentu no integrasaun rejionál.
Prezidente Ramos-Horta kondekora Kolár Orden Timor-Leste nian ba Estraordináriu no Plenipotensiáriu Repúblika Singapura nian ba Timor-Leste, Hu Yee Cheng (Robin), tuir Dekretu Prezidente Repúblika Nú. 26/2026.
Simultaneamente, Prezidente Ramos-Horta kondekora Medalla Méritu ba William Chik Kam Weng, Enkarregadu Negósiu Embaixada Repúblika Singapura iha Timor-Leste, tuir Dekretu Prezidente Repúblika Nú. 27/2026. Serimónia ne’e hala’o iha Palásiu Prezidensiál Nicolau Lobato.
Prezidente Ramos-Horta elojia dedikasaun husi diplomata na’in-rua (2) ne’e, ba Timor-Leste nia dezenvolvimentu no adezaun Timor-Leste nian ba ASEAN.
“Embaixadór Robin Hu no Enkarregadu Negósiu William Chik presta ona servisu sira ho valór aas liu ba povu Timor-Leste. Sira-nia esforsu dedikadu la’ós de’it hametin lasu amizade entre ita-nia nasaun sira maibé fó mós apoiu tanjível ba ita-nia dezenvolvimentu nasionál no ita-nia viajen ba integrasaun tomak iha família ASEAN. Ho onra sira-ne’e, Estadu rekoñese sira-nia kontribuisaun signifikativu no permanente ba ita-nia bem-estar no progresu,” Ramos-Horta hateten iha nia diskursu iha serimónia kondekasaun ne’ebé hala’o iha Palásiu Prezidensiál Nicolau Lobato, Bairru Pite, ohin.
Kolár Orden Timor-Leste nian atribuidu ba kontribuisaun estraordináriu sira ba nasaun, enkuantu Medalla Méritu rekoñese servisu signifikativu hodi hametin orden sosiál no estabilidade nasionál.
Konferénsia onra sira-ne’e ba Embaixadór Hu no Chik subliña Singapura nia kompromisu ne’ebé dura ba Timor-Leste nia futuru no relasaun forte no amigavel entre nasaun rua ne’e.
Orden Timor-Leste mak nasaun nia onra aas liu, rezerva ba individuál sira ne’ebé hala’o ona servisu esepsionál no méritu ba nasaun.
Embaixadór Robin Hu hala’o kna’ar nu’udar Embaixadór Naun-Rezidente Singapura nian ba Timor-Leste dezde fulan-Fevereiru 2023, períodu ida ne’ebé marka ho aprofundamentu signifikativu ba relasaun bilaterál sira.
Pasu xave ida durante nia mandatu maka estabelesimentu Embaixada rezidente dahuluk Singapura nian iha Dili iha fulan-Abril 2024, ho William Chik nomeadu nu’udar Enkarregadu Negósiu hodi lidera misaun ne’e.
Embaixadór Hu dezempeña papél instrumentál hodi haburas kolaborasaun signifikativu entre Singapura no Timor-Leste iha setór oioin, inklui dezenvolvimentu ekonómiku, kapasitasaun no interkámbiu povu ba povu.
Chik nia prezensa iha terrenu mak importante tebes hodi komplementa esforsu sira-ne’e, mantein kontaktu regulár ho ofisiál lokál sira, no asegura implementasaun susesu husi inisiativa sira-ne’ebé konkorda ona.
Iha sira-nia lideransa konjunta, relasaun bilaterál sira buras, marka ho aumentu notável iha interkámbiu sira iha nivel aas. Hirak-ne’e inklui Prezidente José Ramos-Horta nia vizita sira ba Singapura iha 2024 no 2025, Primeiru-Ministru Xanana Gusmão nia vizita ofisiál iha fulan-Jullu 2025, no vizita hosi Vise-Primeiru-Ministru Francisco Kalbuadi Lay iha fulan-Outubru 2024.
Momentu ida-ne’e retribuidu ho vizita ofisiál hosi Ministru Negósiu Estranjeirus Singapura nian, Vivian Balakrishnan, mai Timor-Leste iha fulan-Jullu 2023, no vizita husi Ministru Negósiu Estranjeiru no Kooperasaun Timor-Leste nian, Bendito dos Santos Freitas, ba Singapura iha fulan-Juñu 2024.
Embaixadór Hu no Chik mós sai hanesan instrumentál iha implementasaun susesu husi programa xave sira kapasitasaun nian, hanesan pakote Singapore-Timor-Leste ASEAN Readiness Support (STARS) ka Pakote Apoiu Prontidaun Singapura-Timor-Leste nian ba ASEAN no Apoiu Haforsa STARS (eSTARS).
Implementa tuir Programa Kooperasaun Singapura nian, inisiativa hirak-ne’e fó asesu krusiál ba ofisiál Timor-oan sira ba formasaun relasiona ho ASEAN, oferese apoiu valiozu ba Timor-Leste nia adezaun ba ASEAN iha Simeira ASEAN ba dala 47 iha fulan-Outubru 2025 no loke dalan ba ninia viajen kontinua ba integrasaun tomak.
Jornalista : Hortencio Sanchez
Editór : Cancio Ximenes
