Tribunál emite ona vistu préviu ba reabilitasaun estrada Ermera
DILI, 16 Marsu 2026 (TATOLI)—Prezidente Tribunál Rekursu, Afonso Carmona, informa, Tribunál Rekursu liuhusi Kámara de Kontas, foin daudaun emite vistu préviu ba reabilitasaun estrada Ermera.
“Ermera ne’e vistu tiha ona, fatin sira seluk ha’u seidauk rona tan, sira seidauk relata mai ha’u. Informasaun ne’e husi funsionáriu Kámara de Kontas nian. Ida-ne’e mak ha’u komentáriu,” Afonso Carmona hato’o ba Jornalista sira bainhira halo abertura kursu formasaun VIII ba Majistradu Judisiáriu, Majistradu Ministériu Públiku no Defensór Públiku hamutuk na’in-36, ne’ebé hala’o iha Sentru Formasaun Jurídiku Judisiária, Kaikoli, Segunda ne’e.
Notísia relevante : ADB apoiu millaun $4 ba TL hodi reabilita estrada Ermera ba Fatubesi
Nia dehan, ba restante projetu reabilitasaun estrada sira ne’ebé Governu molok ne’e halo ona lansamentu, Kámara de Kontas halo hela verifikasaun no analiza molok emite vistu préviu.
“Ha’u hanoin depoizde pedidu ne’e tama iha pedidu barak, balun hetan ona vistu hanesan Ermera, sira seluk seluk seidauk tanba buat ne’e liga ho dokumentu tenke haree didi’ak. Tanba ne’e, la’ós pedidu tama ba la’ós dekreta kedan maibé sei haree nia dokumentu liga ho planeamentu ho nia orsamentu no liga ho nia programa,” nia akresenta.
Prezidente Tribunál Rekursu seidauk hatene Diresaun Kámara de Kontas emite ona vistu hira ba projetu reabilitasaun estrada ne’ebé Governu lansa ona.
“Ha’u foin mak haruka surat ida ba Diresaun Kámara de Kontas hodi haruka sira para relata rezultadu atividade ne’e. Ha’u la direta kaer, maibé tanba hanesan Prezidente ha’u tenke ser hetan fali relatóriu kada fulan mais relata ba atividade sira ne’e,” nia katak.
Jornalista : Natalino Costa
Editora : Julia Chatarina
