DILI, 17 Marsu 2026 (TATOLI)–Sekretáriu Jerál ASEAN Korea Centre (AKC), Kim Jae-Shin, hateten AKC prontu fó formasaun kapasitasaun rekursu umanu ba timoroan sira hodi aliña integrasaun ASEAN nian.
Sekretáriu Jerál AKC Kim Jae-Shin hato’o deklarasaun ne’e bainhira fó palestra públika ba interministeriál ASEAN Pontu Vokál iha Ministériu Negósiu Estranjeiru no Kooperasaun (MNEK), Dili, ohin.
Iha palestra públika, Kim Jae-Shin mós introdús AKC nia programa sira ba MNEK, partikularmente iha komérsiu, investimentu, turizmu, arte no kultura no interkámbiu ema-ba-ema.
“Timor-Leste sai membru AKC hodi hametin kooperasaun iha utilizasaun formasaun ne’ebé iha hodi hasa’e insight no koñesimentu hodi kontribui ba nasaun no mós integrasaun ASEAN,” Kim Jae-Shin hateten iha palestra púibliku ne’e.
Iha palestra públika ne’e, Sekretáriu Jerál AKC Kim Jae-Shin reafirma amizade forte entre Timor-Leste no Repúblika Korea, destaka Korea nia apoiu kontinua ba Timor-Leste nia Estadu no konstrusaun nasaun no dezenvolvimentu ne’ebé luan liután inklui kooperasaun iha área saúde, edukasaun, dezenvolvimentu rekursu umanu, agrikultura no reforma setór públiku no mós apoiu ba Timor-Leste nia adezaun no integrasaun ASEAN.
Iha biban ne’e Diretora- Jerál ba Asuntu ASEAN iha MNEK, Elisa Da Silva, hateten Timor–Leste hato’o ona nia proposta ba AKC, hein katak sei aseita iha tempu badak husi AKC hodi kontinua hametin lasu kooperasaun iha futuru.
“Lori Governu Timor-Leste nia naran, ami hato’o agradesimentu ba Sekretáriu Jerál AKC Kim Jae-Shin ne’ebé kontinua enkoraja no motiva Timor-Leste atu hola parte iha programa kapasitasaun AKC nian kona-ba komérsiu, investimentu, turizmu, arte no kultura, no interkámbiu ema ba ema. Espera katak proposta Timor nian sei simu lalais iha liña sira-ne’e,” Elisa hateten.
Sentru ASEAN–Korea nu’udar organizasaun intergovernamentál ida-ne’ebé estabelese iha tinan 2009 atu promove kooperasaun ekonómika no sosio-kulturál entre Estadu membru ASEAN sanulu no Repúblika Koreia (ROK), ne’ebé bazeia iha Seoul hodi hametin parseria sira liuhosi komérsiu, investimentu, turizmu, no interkámbiu kulturál/ema-ba-ema.
Jornalista : Hortencio Sanchez
Editór : Cancio Ximenes
