CYCC solisita MJDAK-PAM Dili atu tau-atensaun estatutu rai ba CYCC
DILI, 17 Marsu 2026 (TATOLI)–Diretór Ezekutivu Sentru Labarik no Juventude Komoro (CYCC-sigla ingleza), Zito Isidoro Freitas, preokupa tebes ba estatutu rai ne’ebé mak seidauk klaru.
Nia solisita Ministériu Juventude, Desportu, Arte no Kultura (MJDAK) no Prezidente Autoridade Munisípiu (PAM) Dili, atu tau-atensaun ba estatutu rai ne’ebé sentru utiliza tanba seidauk klaru, tanba ministériu lubuk ida mak iha interese atu utiliza rai.
“Entaun, CCYC preokupa tebes. Ohin ita halo lansamentu no inagura tiha, maibé liu tiha ida-ne’e ema seluk mai sobu fali oinsá, tanba estatuta rai ne’ebé CCYC utiliza seidauk klaru,” nia dehan iha edifísiu CYCC, Komoro, Dili, Tersa ne’e.
Tuir nia, karik Governu la rezolve estatutu rai, bainhira iha ema seluk hakarak mai utiliza, entaun investimentu ne’ebé tinan barak MJDAK halo iha sentru juventude ne’e sei lakon leet de’it.
Hatán ba kestaun ne’e, Ministru Juventude, Desportu, Arte no Kultura, Nelyo Isaac Sarmento, dehan dezde independénsia sentru juventude ne’e mosu ona iha-ne’e, maibé iha evolusaun ba dezenvolvimentu, ministériu barak iha intensaun ba fatin ida-ne’e, maibé iha intensaun de’it mak dezenvolvimentu.
“Ezemplu, ita iha ministériu edukasaun, ministériu saúde no ministériu seluk mós hakarak fatin ne’e atu konstrui buat ruma. Entaun, ha’u toma atensaun ba ida-ne’e,” nia tenik.
Governante ne’e promete katak sei buka meiu atu haree no fó razaun ba Governu atu haree fatin ne’e serve atu kria sentru juventude.
“Tanba ita iha programa sentru juventude eselente ba ita-nia joven sira, entaun ita presiza hetan sentru juventude ida tuir programa Governu nian, nune’e fatin ne’e mós adekuadu ba ida-ne’e,” Nelyo afirma.
Nia hatutan, eintermu instituisaun Estadu sira sei iha komunikasaun ba malu hodi haree ba futuru fatin ne’e sai sentru ba saida.
“Ba ha’u, fatin ne’e estratéjiku liu. Aleinde ba sentru juventude, bele kria mós fasilidade balun hanesan sentru treinu ba labarik sira atu pratika atividade desportu,” nia hakotu.
Jornalista: Osória Marques
Editór: Xisto Freitas da Piedade
