DILI, 17 Marsu 2026 (TATOLI)—Enkarregadu Negósiu Embaixada Estadu Unidus Amérika iha Timor-Leste, Bruce Begnell, ofisialmente entrega plataforma sensibilizasaun domíniu marítimu SeaVision ba Autoridade Nasionál Marítima Timor-Leste iha baze navál FALINTIL-Forsa Defeza Timor-Leste (F-FDTL) Hera.
Plataforma ne’e simu direta husi Komandante Komponente Navál Comodoro Higinio das Neves, ne’ebé hala’o kna’ar mós nu’udar Diretór Autoridade Marítima Nasioná, no serimónia ne’e asiste husi ofisiál sira husi Navál no Autoridade Marítima Nasionál.
SeaVision nu’udar sistema monitorizasaun marítima ida-ne’ebé dezenvolve iha Estadu Unidu, no sei permite autoridade sira atu akompaña ró sira iha Timor-Leste nia bee no área sira-ne’ebé hale’u, hodi fornese dadus iha tempu reál (realtime data) hodi hametin seguransa marítima no planeamentu operasionál.
Bruce Begnell hateten, apoiu plataforma SeaVision ba autoridade ne’e reflete kooperasaun maka’as entre Estadu Unidu no Timor-Leste hodi avansa seguransa marítima.
“Plataforma ida-ne’e sei ajuda autoridade Timor-Leste nian atu halo monitorizasaun ba atividade marítima sira iha tempu reál no apoia foti desizaun operasionál ne’ebé informadu liután,” Begnell hateten.
Iha fatin hanesan, Comodoro Higinio das Neves simu ho laran-haksolok inisiativa ne’e, hodi nota katak sistema ne’e sei reforsa maka’as kapasidade monitorizasaun marítima nasaun nian.
“Plataforma SeaVision sei hasa’e Autoridade Marítima Nasionál nia abilidade atu halo monitorizasaun ba atividade marítima no hametin koordenasaun entre instituisaun sira-ne’ebé responsável ba protesaun ba ita-nia domíniu marítima,” nia hateten.
Apoiu ne’e subliña parseria forte entre Estadu Unidu no Timor-Leste no kompromisu-hamutuk hodi avansa seguransa marítima, apoia Timor-Leste nia envolvimentu rejionál no integrasaun ASEAN no promove Indo-Pasífiku ida-ne’ebé livre no nakloke.
Jornalista : Hortencio Sanchez
Editór : Cancio Ximenes
