VIKEKE, 17 Marsu 2026 (TATOLI)—Xefe Suku Bibileo, Postu Administrativu Vikeke Vila, Munisípiu Vikeke, Moises Pinto, informa Institutu Jestaun Ekipamentu Apoia Dezenvolimentu Infraestutura, Institutu Públiku (IGEADI, I.P.) normaliza ona sedimentasaun iha mota Uetuku, Bikarin, ne’ebé fó ameasa ba populasaun Suku Bibileo iha tempu udan.
“Kona-ba progresu normalizasaun mota Uetuku área Bikarin ne’ebé durante ne’e ameasa ba ami-nia komunidade, parte IGEADI konklui ona servisu normaliza sedimentasaun mota no tau rai-henek ba satan bee. Ekipa IGEADI aban hanesan ne’e sira retira ona,” Moises Pinto ba TATOLI iha Postu Vikeke Vila, Tersa ne’e.
Autoridade Suku Bibileo ne’e relata, ekipa IGEADI halo normalizasaun ba mota Uetuku purvolta kilómetru tolu (3) no halo barajen ho rai-henek.
“Ha’u haree normalizasaun ne’e satan ona bee mota, maibé ne’e provizóriu de’it. Ita hein udan husi fulan-Abríl no Maiu mak akontese udan boot bele sobu fali tanba ne’e satan ho rai henek de’it. Entaun, fásil para bee mota tun sobu,” nia subliña.
Nia prefere Governu presiza kria morru protesaun ida permanente, atu satan bee mota tanba mota ne’e kada tinan iha tempu udan sempre fó ameasa ba populasaun nia uma no vida.
“Ha’u husu parte Governu presiza tau ba emerjénsia hodi kria morru protensaun ba mota Uetuku, ne’ebé parte IGEADI halo ona normalizasaun ne’e. Se la tau morru protesaun permanenta mota sei sobu filafali,” nia hato’o.
Tuir dadus, populasaun ne’ebé afetadu husi mota Uetuku Bikarin hamutuk uma-kain 700.
Jornalista: Vitorino Lopes da Costa
Editór: Xisto Freitas da Piedade
