DILI, 17 Marsu 2026 (TATOLI)—Papa Leão XIV hateten igreja tenke iha prezensa ativa hodi proteje labarik no grupu vulneravel sira, hanesan parte integrál husi misaun ne’ebé fó fiar no responsabilidade ba morál.
Deklarasaun ida-ne’e hato’o husi Papa bainhira simu partisipante iha sesaun plenária komisaun pontifísia ba protesaun labarik sira iha Vatikanu, iha Segunda (16 Marsu 2025) ne’e.
Iha nia mensajen, Amu Pala subliña katak protesaun ba labarik no indivíduu vulneravel sira la’ós de’it obrigasaun administrativu, maibé tenke sai manifestasaun konkretu husi fiar ne’ebé moris iha loro-loron.
“Protesaun ba sira-ne’ebé vulneravel liu mak vokasaun ne’ebé moris husi evanjéliu rasik, no tenke sai parte husi moris igreja nian,” Papa dehan, tuir Vatican News (segunda, 16 Marsu).
Nia mós alerta katak esforsu prevensaun hasoru no abuzu sira presiza iha kompromisu hamutuk husi elementu igreja hotu, no labele haree hanesan responsabilidade balun de’it nian.
Tuir líder relijiaun katólika ne’e katak hari’i igreja ne’ebé seguru, presiza iha kultúra kuidadu, transparénsia no akuntabilidade ne’ebé sai realidade liuhusi asaun konkretu iha nivel servisu hotu.
Iha okaziaun ne’e, amu Papa Leão XIV hato’o apresiasaun ba komisaun pontifísia ba protesaun labarik sira tanba sira-nia dedikasaun iha kna’ar ne’ebé susar maibé importante tebes.
Nune’e, nia hateten, servisu komisaun nian tenke hatudu kompromisu igreja nian atu nafatin hadi’a-an no asegura protesaun di’ak liubá labarik no grupu vulneravel sira iha mundu tomak.
Iha biban ne’e, amu Papa mós subliña importánsia rona hikas esperiénsia husi vítima no sobrevivente sira hanesan baze ba formulasaun polítika no asaun oioin ba oin.
“Sira-nia sasin tenke sai lian ne’ebé hamosu mudansa, atu igreja sai liu fó oin iha protesaun dignidade ema ida-idak nian,” nia dehan.
Komisaun pontifísia ba protesaun labarik sira ne’e hari’i iha tinan 2014 hosi Papa Francisco nu’udar órgaun konsellu ne’ebé serbisu hodi ajuda igreja dezenvolve polítika prevensaun abuzu no fortelece sistema protesaun ba labarik no indivíduu vulneravel sira.
Jornalista : Alexandra da Costa
Editór : Cancio Ximenes
