Ministru Defeza garante manutensaun ró patrullamentu Jaco no Betano sei finaliza iha tinan ne’e

DILI, 17 Marsu 2026 (TATOLI)—Ministru Defeza Kontra Almirante Donaciano do Rosário da Costa Gomes ‘Pedro Klamar Fuik’, garante manutensaun ró patrullamentu Jaco no Betano sei finaliza iha tinan ne’e.

“Ita espera tinan ne’e ró rua ne’e sei konklui nia manutensaun hodi halo fali operasaun,” Ministru Defeza hato’o ba jornalista sira iha ninia knaar fatin, iha Ministériu Defeza, Fatuhada, Tersa ne’e.

Nia dehan, iha fulan-neen mai ne’e ró ida sei prontu uluk ho manutensaun ne’ebé oin seluk, ho nia kualidade di’ak, nune’e nia kondisaun sei sai foun fali.

“Osan ba manutensaun ba ró rua ne’e hamutuk millaun $5,” nia akresenta.

Notísia relevante : Austrália Seidauk Konstrui Ró Patrullamentu Rua Ba TL

Empreza xineza ne’ebé haree ba indústria konstrusaun ró mak daudaun ne’e reponsável ba manutensaun ró rua.

Governante ne’e haktuir, daudaun tama hela prosesu manutensaun, nune’e ró rua ne’e bele konklui iha tinan ne’e nia rohan hodi bele operasionaliza fali.

“Prosesu manutensaun ne’ebé agora ita halo ne’e hanesan muito profunda, sei troka nia motór sira ne’ebé mak a’at ona, nia kulit sei hadi’a, no nia sistema sira hothotu ne’e falla sei hadi’a hotu,” nia informa.

Jornalista     : Natalino Costa

Editora         : Julia Chatarina